ԵՐԵՎԱՆ, 30 մայիսի— Sputnik. Երեկ կեսօրին կողոպտել են դերասան Ստեփան Ղամբարյանի բնակարանը՝ պատճառելով շուրջ 1 միլիոն 200 հազար դրամի նյութական վնաս։ Sputnik Արմենիայի հետ զրույցում այս մասին հայտնեց Ղամբարյանը։
Նշենք, որ Ղամբարյանն իր թեկնածությունն էր առաջադրել Սոս Սարգսյանի անվան համազգային թատրոնի տնօրենի ընտրությանը, որը կայացավ այսօր։ Նա չմասնակցեց ընտրությանը, քանի որ պետք է ոստիկանություն գնար` գողության մասին հայտնելու։
«Ցերեկը` ժամը 13:00-ից 16:00-ի հատվածում, մտել են տուն. բարեբախտաբար, տանը մարդ չի եղել: Մայրս եկել է տուն ու տեսել, որ ամեն ինչ իրար է խառնված տանը, տակնուվրա են արել», - ասաց Ղամբարյանը։
Նա հայտնեց նաև, որ տնից գողացել են «MacBook» ֆիրմայի համակարգիչ, IPad, ինչպես նաև իր անվանական, օրինական 2 ատրճանակները: Նրա խոսքով` արդեն դիմել է ոստիկանություն, փոխել է տան կողպեքը։
«Ոստիկանները եկել են տուն, զննել ու ոչ մի մատնահետք չեն գտել։ Հավանաբար, պրոֆեսիոնալներ են աշխատել։ Ասում են` հիմա դրսից ինչ–որ խմբեր կազմած մարդիկ են գալիս ու բնակարանային գողություններով զբաղվում։ Կամ էլ գուցե համաներման արդյունքն է սա»,–ասաց դերասանը։
Ինչ վերաբերվում է թատրոնի տնօրենի մրցույթին չմասնակցելուն, ապա Ղամբարյանը հայտնեց, որ մրցույթում հաղթած թեկնածուն` Արման Նավասարդյանը, իր ընկերն է և շատ ուրախ է նրա համար։ Ղամբարյանը շնորհավորեց Նավասարդյանին` մաղթելով նրան բեղուն աշխատանքային օրեր։
Հիշեցնենք, որ այսօր Սոս Սարգսյանի անվան համազգային թատրոնի տնօրեն է ընտրվել թատրոնի դերասան, տնօրենի ԺՊ Արման Նավասարդյանը։
