ԵՐԵՎԱՆ, 5 հունիսի — Sputnik, Լաուրա Սարգսյան. Երևանի քաղաքապետարանը նոր համակարգ է նախաձեռնել մայրաքաղաքի դպրոցներում` հաճախումները վերահսկելու և անվտանգության մակարդակը բարձրացնելու համար։ Համակարգն առայժմ մշակման փուլում է և կներդրվի նոր ուսումնական տարում։ Այդ մասին Sputnik Արմենիայի թղթակցի հետ զրույցում ասաց Երևանի քաղաքապետարանի մամուլի քարտուղար Հակոբ Կարապետյանը։
Նորամուծության համաձայն` դպրոցականներին կբաժանվեն պլաստիկ քարտեր, որոնք կարձանագրեն դպրոցի շենք մտնելու և շենքից դուրս գալու ժամանակը։ Ծնողները նույնպես կարող են ցանկության դեպքում տեղեկություն ստանալ, որ իրենց երեխան դուրս է եկել դպրոցից։
«Նպատակը դպրոցներում անվտանգության մակարդակը բարձրացնելն է։ Քարտերն անվճար կտրամադրվեն։ Տվյալ պահին մենք խորհրդատվություններ ենք անցկացնում դպրոցների տնօրենների, կրթության, արտակարգ իրավիճակների նախարարությունների հետ` օպտիմալ մոդել մշակելու, թեր և դեմ կողմերն ու ռիսկերը հաշվի առնելու համար», – ասաց Կարապետյանը։
Համակարգի գործունեության մանրամասներն ավելի ուշ հայտնի կդառնան, քանի դեռ այն գտնվում է մշակման փուլում։ Հարցին, թե համակարգը երբ կսկսի գործել, Կարապետյանը պատասխանեց` նոր ուսումնական տարում, բայց ստույգ ժամկետն առայժմ հայտն չէ։
Նման համակարգ ներմուծելու նորությունը լուրջ իրարանցում է առաջացրել ինչպես ծնողների, այնպես էլ դպրոցների տնօրենների շրջանում։ Գաղափարը ոմանց փայլուն է թվացել, մյուսներին` անիմաստ։
«Տարրական դասարաններում դա անիմաստ է, քանի որ ամեն դեպքում մենք` ծնողներս ենք երեխաներին տանում դպրոց և վերցնում այնտեղից», – Sputnik Արմենիայի թղթակցի հետ զրույցում ասաց մի ծնող` Անին։
Նրա հետ համակարծիք չեն ավագ դասարանների աշակերտների ծնողները` համարելով, որ համակարգը կօգնի ավելի հանգիստ լինել դպրոցի անվտանգության համար։ Առանց քարտի ոչ բոլորը կարող են մտնել կրթական հաստատություն։ Միակ բանը, որն անհանգստացնում է ավագ դասարանների ծնողներին, այն է, թե ինչպիսի միջոցներ կձեռնարկվեն, եթե երեխան հանկարծ քարտը մոռանա տանը։
Դպրոցներից մեկի տնօրենը, որտեղ պետք է ներդնեն այդ համակարգը, դժվարացավ պատասխանել հարցին` անցաքարտերն արդյունավետ կլինեն, թե ոչ։ «Կներդնեն, այդ ժամանակ էլ կգնահատենք», – ասաց նա։
Միաժամանակ կենտրոնում գտնվող մեկ այլ դպրոցի տնօրեն, հակառակը, նշեց, որ կողմ է այդ նախաձեռնությանը։
«Ես վաղուց էի երազում, որ Հայաստանում նման համակարգ ներմուծվի։ Տեսել եմ շատ երկրներում և միշտ մտածում էի, որ լավ կլիներ, եթե մեզ մոտ էլ նման բան ներդնեն», – Sputnik Արմենիայի թղթակցի հետ զրույցում ասաց տնօրենը։
Նա վստահ է, որ դա կնպաստի աշակերտների կարգապահությանը և իսկապես դպրոցներում կբարձրացնի անվտանգության մակարդակը։ Նրա կարծիքով` ծնողները երբեմն չգիտեն, որ իրենց երեխաները փախչում են վերջին դասերից, և համակարգը կարող է լուծել այդ խնդիրը։
Ծնողները ցանկության դեպքում կկարողանան ծանուցում ստանալ, և դա կհեշտացնի ոչ միայն իրենց, այլ նաև դպրոցի ղեկավարության կյանքը։
«Իսկ այն հարցը, թե ինչ կլինի, եթե երեխան կորցնի քարտը, պետք է լուծվի, ներդրվի այլընտրանքային տարբերակ։ Սակայն դա չպետք է սովորություն դառնա։ Ի դեպ, այդ միջոցը կօգնի երեխաների մոտ զարգացնել պատասխանատվության և կարգապահության զգացմունք», – ասաց նա։
Համակարգը նաև թույլ կտա գրիպի կամ այլ համաճարակների բռնկումների ժամանակ առողջապահության նախարարությանը հստակ և օպերատիվ տվյալներ տրամադրել դպրոցներում հաճախելիության քանակի մասին։
Տնօրենի խոսքով` միակ բացասական կողմն այն է, որ համակարգը կներդվի ոչ բոլոր դպրոցներում, այլ միայն այնտեղ, որտեղ շատ են աշակերտները։
