ԵՐԵՎԱՆ, 10 հունիսի –Sputnik. Հայաստանում փորձարկվում է բուժզննման և ախտորոշման նոր սարք։ Տեխնոլոգիայի և սարքի հեղինակները Մոսկվայի պետական համալսարանի գիտնականներ են։
Ինչպես Sputnik Արմենիային հաղորդեց Մոսկվայի պետական համալսարանի համալսարանական կլինիկայի տնօրեն Արմայիս Կամալովը, ախտորոշման սարքերը՝ ստեղծված համալսարանում, արդեն փորձարկվում են Ռուսաստանի շրջաններում և Հայաստանի մարզերում։
Նման սարքի օգնությամբ կարելի է իմանալ հիվանդի հիմնական տվյալները և դրանք ինտերնետով փոխանցել հիվանդանոց։ Ընդ որում` դա կարող է անել ոչ միայն բժիշկը, այլ նաև բուժքույրը կամ ֆելդշերը։ Տվյալներն ընդունում է բժիշկը, որն անհրաժեշտ ցուցումներ է տալիս` ինչպես օգնություն ցուցաբերել տեղում կամ, անհրաժեշտության դեպքում, հոսպիտալացնել հիվանդին։ Բժշկական տվյալների փոխանցումը, բնականաբար, պաշտպանված է։
«Այդ սարքն ընդհանուր ուժերով ստեղծել են մեր համալսարանի տարբեր գիտնականներ։ Մեր՝ բժիշկների ցանկությունները միավորել ենք ֆիզիկոսների հնարավորությունների հետ։ Աշխարհում, իհարկե, շատ կան նման սարքեր, բայց մերը համեմատաբար էժան է։ Ես կասեի՝ գինը խելքին մոտ է», - հավելեց Կամալովը։
Նոր սարքը չափսերով նման է սովորական ճամպրուկի։ Ուստի այն տեղափոխելը հեշտ է։ Հեռավոր գյուղերի համար, որտեղ լավագույն դեպքում գործում է մեկ բուժկետ, դա շատ կարևոր է։
«Ինքս էլ եմ ցնցված». ռուսաստանցի Սարգիս Մկրտչյանը ստարտափի համար 1 միլիոն ռուբլի է ստացել
Այն արդեն փորձարկել են գյուղերում, Ռուսաստանի մի քանի շրջաններում։ Այժմ փորձարկումներ կշարունակվեն Հայաստանում։
Հիմա Կամալովն ու նրա գործընկերները պատրաստվում են Հայաստանի առողջապահության նախարարության հետ քննարկել, թե կարելի՞ է արդյոք նման սարքեր տեղադրել հնարավորինս շատ գյուղերում։
