ԵՐԵՎԱՆ, 23 հունիսի — Sputnik, Խաչիկ Չախոյան. Սամբոյի Հայաստանի հավաքականը Եվրոպական երկրորդ խաղերում արդեն արծաթե մեկ մեդալ նվաճել է: Դավիթ Գրիգորյանը, հասնելով եզրափակիչ, պարտվել է Ռուսաստանի ներկայացուցիչ Անդրեյ Պերեպելյուկին: Բայց այսօր մեր սամբիստները կարող են թարմացնել մեր ընտրանու մեդալների հավաքածուն:
Տիգրան Կիրակոսյանը սամբոյի մրցումներում իր ելույթները սկսեց քառորդ եզրափակիչից , որտեղ 7:0 հաշվով հաղթեց ուկրաինացի Ռոման Բրատչենկոյին: Կիսաեզրափակիչում Կիրակոսյանը հավասար պայքարում հաղթանակի հասավ ռուս՝ Անդրեյ Կուբարկովի նկատմամբ:
90 կգ քաշային կարգում Գրիգոր Սահակյանը բրոնզե մեդալի համար պայքարի մեջ է մտնելու վրացի Պաատա Ղվինաշվիլիի հետ: 74կգ քաշային կարգում Արսեն Ղազարյանը սփոփիչ գոտեմարտում հաղթելով ադրբեջանցի Աբդուլա Աբդուլաևին, նույնպես բրոնզի համար է պայքարելու: Մրցակիցը մեր հայրենակիցն է՝ Հունաստանը ներկայացնող Գևորգ Մարկարյանն է:
Ձյուդոիստների մրցաշարում Հայաստանի միակ ներկայացուցիչ՝ Ֆերդինանդ Կարապետյանը 73կգ քաշային կարգում երկու անընդմեջ հաղթանակ տոնեց նախ պորտուգալացի Խորխե Ֆերնանդեշի, ապա ռուսաստանցի Մուսա Մուգուշկովի նկատմամբ, բայց քառորդ եզրափակիչում պարտվեց Ադրբեջանը ներկայացնող Ռուստամ Օռուջովին:
Սփոփիչ գոտեմարտում Կարապետյանի մրցակիցը Ադրբեջանը ներկայացնող մեկ մարզիկ՝ Հիդայատ Հեյդարովն է լինելու:
Բռնցքամարտի մրցումներում այսօր ռինգում իրենց մենամարտերը կանցկացնեն Արթուր Հովհաննիսյանը (49 կգ), Արման Դարչինյանը (75 կգ) և Անուշ Գրիգորյանը (51 կգ):
