ԵՐԵՎԱՆ, 7 հուլիսի – Sputnik. Ավարտվել է ՀՀ վարչապետ Նիկոլ Փաշինյանի պաշտոնական այցը Վիետնամ, նրա գլխավորած պատվիրակությունն այժմ Սինգապուրում է։ Այս մասին Facebook-յան իր էջում լուսանկարին կից գրել է ՀՀ վարչապետի մամուլի խոսնակ Վլադիմիր Կարապետյանը։
«Ամփոփելով` ցանկանում եմ նշել, որ վարչապետի բոլոր հանդիպումները, այդ թվում՝ Վիետնամի իր գործընկերոջ և գործարար շրջանակների հետ, անցան արդյունավետ։ Տնտեսության և հումանիտար ոլորտներում ձեռք բերվեցին կոնկրետ պայմանավորվածություններ, որոնց կյանքի կոչման ուղղությամբ, վստահ եմ, համապատասխան գերատեսչությունները կձեռնարկեն ակտիվ աշխատանքները։ Նշեմ, որ վիետնամական բավականին խոշոր գործարարներ շահագրգռվածություն հայտնեցին համագործակցելու հայկական կողմի հետ, նրանք մեծ հետաքրքրություն ցուցաբերեցին հայկական արտադրանքի, կոնյակի, գինու, վերամշակված գյուղմթերքի նկատմամբ»,- նշել է Վլադիմիր Կարապետյանը։
Նա ընդգծել է, որ վարչապետ Փաշինյանի պայմանավորվածությունները պետք է գործնական փուլ մտնեն աշնանը հայ-վիետնամական գործարար համաժողովի ընթացքում՝ հավելելով, որ քաղաքական առումով երկու երկրներն ունեն լիարժեք փոխըմբռնում, ինչը ևս կարևոր է հատկապես միջազգային հարթակներում համագործակցելու առումով։
Վլադիմիր Կարապետյանը հրապարակած լուսանկարում նշել է, որ գտնվում է Սինգապուրում:
Հիշեցնենք, որ վարչապետ Նիկոլ Փաշինյանն այսօր՝ հուլիսի 7–ին, ժամանել է Սինգապուր։ Այս պահին Սինգապուրի Սուրբ Գրիգոր Լուսավորիչ հայկական եկեղեցում ընթանում է վարչապետի հանդիպումը Սինգապուրի և հարակից երկրների հայ համայնքների ներկայացուցիչների հետ։
Այցի շրջանակում Հայաստանի վարչապետը հանդիպումներ կունենա Սինգապուրի բարձրագույն ղեկավարության՝ Սինգապուրի նախագահ Հալիմա Յակոբի, Սինգապուրի վարչապետ Լի Սիեն Լոնգի, Սինգապուրի խորհրդարանի խոսնակ Թան Չուան-Ջինի հետ:
Մեր կոնյակն ու գինին կարող են գրավել վիետնամական շուկան. Սուան Ֆուքն ընդունել է Փաշինյանին
Նախատեսվում է երկկողմ համագործակցության մասին փաստաթղթերի ստորագրում, հանդիպումները Սինգապուրի գործարար շրջանակների հետ: Վարչապետի պաշտոնական այցը Սինգապուր կավարտի հուլիսի 9–ին։ Փաշինյանին պաշտոնական այցերի ընթացքում ուղեկցում է նրա տիկինը՝ Աննա Հակոբյանը։
