ԵՐԵՎԱՆ, 1 սեպտեմբերի — Sputnik. Գիտելիքի և դպրության օրը՝ սեպտեմբերի 1-ը, այս տարի կիրակի է: Չնայած դրան, կրթության ոլորտի պատասխանատուները որոշել են ուսումնական տարվա առաջին օրը չտեղափոխել։ Փոխարենը խոստացել են` դաս այսօր չի լինելու, պարզապես հանրապետության բոլոր ուսումնական հաստատություններում կանցկացվեն սեպտեմբերմեկյան տոնական միջոցառումներ:
Դպրոցականների համար այս տարի սեպտեմբերի 1-ից նախարարությունը ևս մեկ անակնկալ է պատրաստել։ Այդ մասին երեխաները կիմանան, երբ կստանան այս տարի նոր տպագրված դասագրքերը։
Երեխաների առողջության պահպանմամբ մտահոգ պատասխանատուները որոշել են թեթևացնել դպրոցական պայուսակները։ Այդ նպատակով շուրջ 48 անուն դասագիրք հրապարակվել է երկու հատորով` առաջին ու երկրորդ կիսամյակներով։
Սեպտեմբերի մեկն առանց 1-ին դասարանի. Տավուշի գյուղերում կա՛մ երեխաներն են քիչ, կա՛մ դպրոցը դպրոց չէ
Ինչ վերավերում է դպրոցական համազգեստին, ինչպես նախորդ, այնպես էլ այս տարի կպահպանվի երեխաների` հագուստի ընտրության ազատության իրավունքը։ Նախարարությունը հերթական անգամ հիշեցնում է՝ դպրոցը չի կարող որևէ հագուստ պարտադրել աշակերտին, այդ հարցը ծնողի ու երեխայի որոշելիքն է։
Նախարարությունը դեմ չէ սև ու սպիտակին, դեմ է սև ու սպիտակը պարտադրելուն։
Իսկ որպեսզի ուսուցիչներն էլ այս տարի ուսումնական տարին ավելի բարձր տրամադրությամբ սկսեն, կառավարությունը նրանց համար տոնական անակնկալ է պատրաստել. սեպտեմբերի 1-ից 10%-ով կբարձրանան հանրապետության 38 000 ուսուցիչների աշխատավարձերը։
Նշենք նաև, որ պաշտոնական տվյալներով՝ Հայաստանի 1409 դպրոցներում սովորում է 360 746 աշակերտ, իսկ այս տարի դպրոց առաջին անգամ ոտք դրած առաջին դասարանցիների ճշգրիտ թիվը հայտնի կդառնա արդեն սեպտեմբեր ամսվա ընթացքում։
