ԵՐԵՎԱՆ, 9 սեպտեմբերի — Sputnik. «Ամբողջ ձայնով» ("Во весь голос!") միջազգային երաժշտական հեռուստատեսային շոուի հայ մասնակիցները պատրաստ են ելույթին ու հաղթելու մտադրությամբ են Մոսկվա մեկնում։ Այս մասին այսօր Երևանում կայացած մամուլի ասուլիսի ժամանակ ասաց Հայաստանում «Ամբողջ ձայնով» ("Во весь голос!") մրցույթի համակարգող Սուսաննա Բարսեղյանը։
Նա նշեց, որ Հայաստանի ներկայացուցիչներն արդեն երկրորդ անգամ են մրցույթի մասնակցում։ Այս անգամ հանրապետությունը ներկայացնելու են Մոսկվայում ապրող երկու դերակատարներ` «Ամբողջ ձայնով» նախագծի մասնակից Տանյա Գևորգյանն ու երգիչ Վարդան Վարդանյանը։
Հայուհի Լիանան առաջին հաղթանակը գրանցեց Ուկրաինայի «Ձայնը» նախագծում. տեսանյութ
Իսկ Հայաստանից Մոսկվա է մեկնելու «Ռազնիե» (Разные) խումբը, որը կազմված է տարբեր երկրներից եկած մասնակիցներից (Էդվարդ Մարուքյան, Մերի Վարդանյան, Արուսյակ Ավետիսյան, Մարիա Կարապետյան)։ Թիմի մարզիչը լինելու է երգչուհի Մարգարիտա Պոզոյանը։
«Երեք մրցութային օր է լինելու։ Առաջին օրը նվիրված է Վալերի Սյուտկինի արվեստին. Վարդան Վարդանյանը կկատարի նրա երգերից մեկը։ «Город 312» խմբի երեկոյի ընթացքում Տանյան կկատարի այդ խմբի երգերից մեկը, իսկ «Ռազնիե» (Разные) խումբը կկատարի Մաքսիմ Դունաևսկու «Փոփոխությունների քամի» երգի ջազային տարբերակը։ Կարծում եմ` սա մրցույթի լավագույն երգն է, ու մեր բախտը բերել է», – նշեց Բարսեղյանը։
Երեխաները խոստովանեցին, որ շատ են հուզվում ելույթից առաջ, սակայն հույս ունեն հաղթել ոչ թե «Լավագույն խումբ», «Լավագույն երգչուհի» կամ «Լավագույն երգիչ», այլ «Լավագույն երկիր» անվանակարգում։ Նրանց ոգեշնչում է այն փաստը, որ շոուի երաժշտական պրոդյուսերը բաժանորդագրվել է youtube–ի իրենց ալիքին ու չի թաքցնում իր համակրանքը։
Հայ տղայի առաջ խոնարհվել են. «This is a man's world»–ը ցնցել է դահլիճին. տեսանյութ
Նշենք` «Ամբողջ ձայնով» ("Во весь голос!") մանկական երաժշտական մրցույթը երաժշտական նախագիծ է, որում մրցում են ԱՊՀ ու Բալթիայի երիտասարդ կատարողները։ Մրցույթի կազմակերպիչներն են Ռուսաստանի ազգությունների գործերի դաշնային գործակալությունը, ՌԴ ԱՊՀ պետությունների գործերով դաշնային գործակալությանը կից «Երեխաներն օգնում են երեխաներին» բարեգործական հիմնադրամը։
