ԵՐԵՎԱՆ, 20 սեպտեմբերի - Sputnik. Երևանի ընդհանուր իրավասության դատարանն այսօր մերժեց ՀՀ երկրորդ նախագահ Ռոբերտ Քոչարյանին գրավի դիմաց ազատ արձակելու միջնորդությունը, որը ներկայացրել էր փաստաբան Հովհաննես Խուդոյանը: Քոչարյանի փաստաբանները դատարանին դիմել էին նաև նրան ստորագրությամբ ազատ արձակելու միջնորդությամբ:
«Որոշումը կարող է բողոքարկվել հրապարակման պահից 10-օրյա ժամկետում»,- վճիռը հրապարակելուց հետո հայտարարեց դատավոր Աննա Դանիբեկյանը:
Դատարանի բակում կրկին հավաքվել են և՛ Քոչարյանի աջակիցները, և՛ ընդդիմադիրները: Մինչ վճռի հրապարակումը մի կողմը, դիմելով դատավոր Աննա Դանիբեկյանին, գոռում էր՝ «Դանիբեկյա՛ն, դուխով», մյուս կողմը՝ «Դանիբեկյա՛ն, խելքով»:
Քոչարյանի գործով ՍԴ որոշումն ակնհայտորեն ապօրինի էր. Նիկոլ Փաշինյան
Հիշեցնենք՝ ՀՀ երկրորդ նախագահ Ռոբերտ Քոչարյանի փաստաբանական թիմը սեպտեմբերի 19-ին վերաքննիչ բողոք էր ներկայացրել Առաջին ատյանի դատարանի՝ Քոչարյանին կալանավորելու որոշման դեմ։
Սեպտեմբերի 4-ին Սահմանադրական դատարանը հրապարակել էր որոշումը, որով անվավեր է ճանաչել ՀՀ քրեական դատավարական օրենսգրքի 35-րդ հոդվածը` նշելով, որ այն հակասում է ՀՀ Սահմանադրության մի շարք հոդվածների։
Այս որոշումը հիմք ընդունելով ՝ Քոչարյանի փաստաբաններն Ընդհանուր իրավասության դատարանին միջնորդել էին անհապաղ վերացնել նախագահի խափանման միջոց կալանքը և դադարեցնել նրա նկատմամբ քրեական հետապնդումը։
Դատարանը, սակայն, դատավոր Աննա Դանիբեկյանի նախագահությամբ, սեպտեմբերի 17-ին հրապարակված որոշմամբ մերժել էր պաշտպանների միջնորդությունը։
Ռոբերտ Քոչարյանին ազատ արձակելու հիմքեր չկան․ գլխավոր դատախազությունը՝ ՍԴ որոշման մասին
Հիշեցնենք նաև, որ 2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
