ԵՐԵՎԱՆ, 4 Հոկտեմբեր — Sputnik. Հոկտեմբերի 7-ին նշվող Գրադարանավարի օրվա ծրագիրն այս տարի նվիրված կլինի Հովհաննես Թումանյանի և Կոմիտասի 150-ամյա հոբելյաններին: Այս մասին հայտնում է ՀՀ կրթության, գիտության, մշակույթի և սպորտի նախարարության պաշտոնական կայքը։
«Նախարարությունը, կարևորելով գրադարանների դերը հանրության կյանքում, իրականացնում է «Թումանյան-Կոմիտաս-150» ծրագիրը։ Դրա շրջանակում Հայաստանի և Արցախի, ինչպես նաև նախարարության ենթակայությամբ գործող ուսումնական հաստատությունների 217 գրադարաններում կիրականացվի 354 միջոցառում»,–նշված է հաղորդագրության մեջ։
Հովհաննես Թումանյանի թոռներն ու ծոռները հավաքվել են Հայաստանում
Ծրագրին միացած 217 գրադարաններում տեղի կունենան գրքերի ցուցահանդես-վաճառքներ, հետաքրքիր հանդիպումներ, ֆիլմերի ցուցադրություններ, գեղարվեստական համույթների մասնակցությամբ համերգներ, ստեղծագործական աշխատանքների տոնավաճառ-ցուցահանդեսներ:
Ստամբուլում Կոմիտասի 150–ամյակին նվիրված համերգ կլինի
Հիշեցնենք, որ 2004–ից ՀՀ կառավարության որոշմամբ հոկտեմբերի 7-ը նշվում է «Գրադարանավարի օր»: Հոկտեմբերի 7-ին նախարարությունում կկայանա գրադարանային ոլորտի մի խումբ աշխատակիցների պարգևատրման արարողությունը:
