ԵՐԵՎԱՆ, 23 հոկտեմբերի – Sputnik. Երևանի կենտրոնում ապամոնտաժվել է 7 ապօրինի կրպակ ու տաղավար: Այս մասին տեղեկանում ենք Երևանի քաղաքապետարանի պաշտոնական կայքից։
«Մայրաքաղաքի ճարտարապետական տեսքը պահպանելու, ընդհանուր օգտագործման տարածքները բարելավելու, ինչպես նաև կենտրոնի մայթերի ծանրաբեռնվածությունը նվազեցնելու ու բացօթյա առևտուրը կանոնակարգելու նպատակով ապամոնտաժվել են, մասնավորապես, Մանկավարժական համալսարանի և Կոնսերվատորիայի հարևանությամբ, չգործող ու հակասանիտարական վիճակում գտնվող ծաղկի տաղավարները»,- նշված է քաղաքապետարանի տարածած հաղորդագրության մեջ:
Բացի այդ, հետևելով քաղաքապետարանի և Կենտրոն վարչական շրջանի համապատասխան ստորաբաժանումների աշխատակիցների հորդորներին, տնտեսվարողները սեփական ուժերով ապամոնտաժել են Խանջյան փողոցի 13, Խորենացի 26, Մաշտոցի պողոտայի 3 հասցեների դիմաց տեղադրված տաղավարները։
Երևանի 35 հազար անօրինական ավտոտնակները վերջին շանսը կստանան
Ապամոնտաժվել են նաև ծառերի վրայով անցկացրած էլեկտրական հոսանքալարերը, որոնք ստեղծել էին հրդեհավտանգ իրավիճակ: Տարածքներն ամբողջությամբ մաքրվել են, ըստ անհրաժեշտության, նաև կբարեկարգվեն:
