ԵՐԵՎԱՆ, 25 հոկտեմբերի — Sputnik. Ամբողջ աշխարհի հայ ստարտափերները հետաքրքրված են «ՆերՈւժ» ծրագրով և ուզում են իրենց նախագծերը իրականացնել Հայաստանում։ Այս մասին այսօր Sputnik Արմենիայի թղթակցի հետ զրույցում ասաց սփյուռքի գործերի գլխավոր հանձնակատարի գրասենյակի ծրագրի համակարգող Լիանա Սիմոնյանը։
Ծրագիրը նախաձեռնել է ՀՀ սփյուռքի գործերի գլխավոր հանձնակատարի գրասենյակն ու ՀՀ բարձր տեխնոլոգիական արդյունաբերության նախարարությունը։ Մասնակիցները մինչև 30 հազար դոլարի չափով դրամաշնորհներ կստանան Հայաստանում իրենց ձեռնարկությունները զարգացնելու համար։ Ծրագրի մեկնարկը կտրվի դեկտեմբերի 16-20-ը կայանալիք միջոցառումների շրջանակում:
Թեյի ստարտափ կամ ինչով են հայերն ուրախացնում ռուս տատիկներին
«Այս տարի ունենք դիմումներ տարբեր տեղերից՝ ԱՄՆ-ից, Եվրոպայից, Ռուսաստանից, Մերձավոր և Միջին արևելքից, Ավստրալիայից, Հարավային Կորեայից: Նախատեսում էինք հոկտեմբերի 21–ին դադարեցնել հայտերի ընդունումը, սակայն շատերը խնդրում էին երկարացնել ժամկետը։ Հետաձգեցինք դեդլայնը մինչև նոյեմբերի 3–ը»,- ասաց Սիմոնյանը։
ՀՀ բարձր տեխնոլոգիական արդյունաբերության նախարարի խորհրդական, ծրագրի պատասխանատու Գայանե Սերոբյանը հայտնեց, որ այս տարի լուրջ փոփոխություններ են տեղի ունեցել. ծրագրին կարող են մասնակցել միայն տեխնոլոգիական ստարտափները։
«Այս անգամ ծրագիրը կապել ենք «Հայկական վիրտուալ կամուրջ»՝ ավելի գլոբալ նախագծի հետ: Եվ դրա շրջանակում «Ներուժ» ծրագրի միջոցով մենք թիրախավորում ենք հետևյալ նպատակը՝ սփյուռքահայերը հրավիրվում են Հայաստան ոչ թե հիմնվելու և ապրելու, այլ իրենց տեխնոլոգիական ստարտափը Հայաստանում գրանցելու և զարգացնելու հնարավորություն ստանալու համար: Բայց սա ևս ամենը չէ. Հայաստանում առկա էկոհամակարգի միջոցով մենք այդ ստարտափներին հնարավորություն ենք տալու հետագայում դուրս գալու գլոբալ աքսելերատորներ, տեխնոլոգիական հաբեր, համաշխարհային շուկաներ, որտեղ հնարավորությունները շատ ավելի լայն են»,- նշեց նա:
Սերոբյանը հավելեց, որ տարածաշրջանում այլ երկրների հանդեպ Հայաստանն ունի այլ մրցակցային առավելություններ, որոնցից ամենաազդեցիկը հայկական սփյուռքն է՝ իր գործնական կապերով համաշխարհային տեխնոլոգիական կենտրոնների և շուկաների հետ, և սա հնարավորություն է տալիս կամրջել Հայաստանում մեկնարկող և աճող ընկերություններին այդ շուկաների հետ:
Բացի այդ, ծրագրի շրջանակում ոչ միայն դրամաշնորհ է տրամադրվելու, այլև ծրագրին հրավիրված են լինելու Հայաստանում առկա գրեթե բոլոր ինկուբատորները, աքսելերատորները, հնարավոր ներդրողները, որոնք ևս մրցանակներ են առաջարկելու։
Սերոբյանը նշեց, որ այս տարի ծրագրին կարող են մասնակցել 14 ոլորտների տեխնոլոգիական ստարտափներ (ֆինանսական, սոցիալական, գյուղատնտեսական, ռոբոտաշինական, զբոսաշրջային և այլն)։ Ակնկալվում է, որ մրցույթին կմասնակցեն 50-60 ստարտափ:
Այս տարի մասնակիցներն իրենք են ավիատոմսեր գնելու ու միայն 25 ստարտափի համար են միջոցներ տրամադրվել` ելնելով որոշակի չափանիշներից:
Ինչպես հասցնել ամեն ինչ. գյումրեցի ուսանողը ստարտափ է բացել և ռոբոտատեխնիկա է սովորեցնում
«ՆերՈւժ» ծրագրի նպատակն է ստարտափների միջոցով հայկական համայնքի ներուժն օգտագործել Հայաստանի զարգացման համար։ Ծրագիրը մեկնարկել է 2018 թվականին։ Այն իրականացնում էր Սփյուռքի նախարարությունը, որն արդեն կազմալուծվել է։
