Պաշտպանների կողմից Վերաքաննիչ դատարան ներկայացված բողոքն արդեն ընդունվել է վարույթ և նշանակվել դատական նիստ: Անդրադառնալով իր դեմ հարուցված քրեական գործի հանգամանքներին, այս մասին Sputnik Արմենիային ասաց Ազգային ժողովի աշխատակազմի ղեկավարի նախկին տեղակալ Արսեն Բաբայանը։
Բաբայանն ակնկալում է արդարադատություն և շարունակում է պնդել, որ ինքը քաղբանտարկյալ է և նույնիսկ պատանդ։ Ըստ նրա` վերջին իրադարձությունները դրա վառ վկայությունն են: Իր դեմ քրեական գործ հարուցելու նպատակը նա ի սկզբանե համարում է քաղաքական, քանի որ պետք էր որևէ ճանապարհով հասնել ՍԴ նախագահ Հրայր Թովմասյանի լիազորությունների դադարեցմանը, հետևաբար, ընթացքում տեղի ունեցած բոլոր գործողություններն ապօրինի էին:
Ի՞նչ գործունեություն կծավալի Արսեն Բաբայանը և հանուն ինչի՞. նա խոսեց ապագա պլաններից
Անդրադառնալով այն հարցին, որ ինքը քաղաքականությամբ չի զբաղվել և չի կարող համարվել քաղբանտարկյալ՝ Բաբայանը նման տեսակետը համարում է ծիծաղելի, որովհետև քաղաքական հետապնդումների ենթարկվելու համար պարտադիր չէ, որ անձը լինի քաղաքական գործիչ կամ զբաղվի քաղաքականությամբ:
«Եթե գործընթացներն իրավական չեն, ապա ինչպիսի՞ն պետք է լինեն, եթե ոչ քաղաքական: Եթե գործընթացներում մեջբերվում է օրենքի որևէ դրույթ, ապա դա դեռ չի նշանակում, որ գործընթացն իրավական է: Երբ դիտարկում ենք այն հարցը, թե արդյո՞ք նման դրույթները պետք է լինեին գործընթացում` հասկանում ենք, որ իրավական գործընթացի շղարշի տակ թաքնվելով՝ իրականացվում է լուրջ քաղաքական հետապնդում»,-նշում է Արսեն Բաբայանը:
Համաներման մասին օրենքը պարզապես արգելում է նախաքննություն իրականացնող մարմնին հարուցել քրեական գործ 314-րդ (պաշտոնեական կեղծիք) հոդվածով: Այդուհանդերձ, գործի շրջանակներում համաներումն այն գործիքը չէ, որից ցանկացել է օգտվել Բաբայանը: Ընդհանրապես, նման հարց էլ չի եղել: Ձերբակալությունը նույնպես նա համարում է ապօրինի, որովհետև հիմքում դրել էին նախաքննությունից թաքնվելը, մինչդեռ ինքը քննիչի հեռախոսազանգից հետո ներկայացել էր նախաքննության մարմին:
Հիշեցնենք, որ ԱԺ աշխատակազմի ղեկավարի նախկին տեղակալ Արսեն Բաբայանը ձերբակալվել էր հոկտեմբերի 21-ի երեկոյան` պաշտոնեական կեղծիք կատարելու կասկածանքով։
Վարոսյան. «Իսկ Արսեն Բաբայանին հարցրե՞լ են` ուզու՞մ է իրեն համաներում շնորհեն, թե՞ ոչ»
Ավելի ուշ նրան մեկ այլ մեղադրանք էր առաջադրվել ՀՀ քրեական օրենսգրքի 300-րդ հոդվածի 1-ին մասով (իշխանությունը յուրացնելուն օժանդակել)։
Հոկտեմբերի 24-ին Բաբայանը կալանավորվել էր։ Հատուկ քննչական ծառայության պաշտոնական հիմնավորման համաձայն` պաշտոնական անձինք, որոնց թվում է նաև Բաբայանը, ՀՀ սահմանադրական դատարանի նախկին նախագահ Գագիկ Հարությունյանի` լիազորությունները վայր դնելու գործընթացում կատարել են պաշտոնեական կեղծիքներ։
