ԵՐԵՎԱՆ, 21 նոյեմբերի – Sputnik. Սյունիքի նախկին մարզպետ Սուրիկ Խաչատրյանի եղբայրը` Աղալար Խաչատրյանը, պատրաստվում է դատարան դիմել։ Նա այս մասին ասել է «Ժողովուրդ» օրաթերթին, որը փորձել է պարզել, թե ինչ խողովակների և հողատարածքի առուծախի պատմություն է, որի պատճառով ՀՔԾ-ն մեղադրանք է առաջադրել Սյունիքի նախկին մարզպետին՝ հանրահայտ «Լիսկային»: Ըստ քրգործի` այս պատմության մեջ Սուրիկ Խաչատրյանի եղբայրն էլ է եղել:
«Ես ցանկանում եմ իրենց դատի տալ, եղբայրները ի՞նչ կապ ունեն, մի եղբայրը ես եմ, մյուսը եղբայրն էլ մահացել է»,– ասել է Աղալար Խաչատրյանը:
ՀՔԾ–ի տարածած հաղորդագրության համաձայն` նախկին մարզպետ Խաչատրյանը 2011-2012թթ.-ին Նորավան համայնքի ղեկավար Լավրենտիկ Առաքելյանին ապօրինի կարգադրել է համայնքին պատկանող 5.132.891 դրամ արժողությամբ մետաղական խողովակներն առանց որևէ օրինական հիմքի հանձնել իր եղբորը, Լ. Առաքելյանն էլ կատարել է կարգադրությունը: Բացի այդ, 2016թ.-ին Ս. Խաչատրյանը մի ապօրինի կարգադրությամբ էլ Ակներ համայնքի ղեկավարից պահանջել է համայնքի սեփականություն հողամասից կեղծ աճուրդով օտարել Աշոտ Գևորգյանին: «Լիսկայի» այս կարգադրությունն էլ կատարել են: Եվ այժմ մեղադրանք է առաջադրվել և՛ Լ. Առաքելյանին, և՛ Ա. Գևորգյանին: Սուրիկ Խաչատրյանի նկատմամբ հետախուզում է հայտարարվել, խափանման միջոցը կալանավորումն է:
Աղալար Խաչատրյանը թերթին ասել է, որ Նորավան համայնքի ղեկավարի հետ չի շփվել և նրան չի էլ ճանաչում։
«Ուզում են երևի գցեն մահացած եղբորս վրա, նման բան գոյություն չունի, 3-4 տարի առաջ է մահացել, նա էլ դժվար այդ ամենի հետ կապ ունենա: Շանտաժ է էլի, մի սուտ բան սարքում են, էնքան որ մի բան սարքեն»,– ասել է նա:
Թերթը հետաքրքրվել է նաև` կապ ունի՞ եղբոր հետ։ Աղալար Խաչատրյանը պատասխանել է, որ միշտ էլ խոսում է հետը, «վիճակը լավ չի, պառկած է»:
Հիշեցնենք` օգոստոսի 20-ին ԱԺ նախկին պատգամավոր գեներալ Սեյրան Սարոյանը Էջմիածնի իր տանը մամուլի ասուլիսի ժամանակ հայտնել էր, որ Սուրիկ Խաչատրյանի վիճակը ծանր է, կոմայի մեջ է, Փարիզում է, նրա սիրտը վիրահատել են:
ԱԱԾ–ն բացահայտել է Սուրիկ Խաչատրյանի պաշտոնեական կեղծիք կատարելու դեպքը
