ԵՐԵՎԱՆ, 19 Դեկտեմբեր — Sputnik. Հայաստանի Հանրապետության արտաքին և ներքին անվտանգությունը բոլոր առաջնահերթությունների առաջնահերթությունն է: Ինչպես տեղեկացնում են կառավարության մամուլի ծառայությունից, այս մասին այսօր ասել է ՀՀ վարչապետ Նիկոլ Փաշինյանը` Ազգային անվտանգության մարմինների ծառայողի օրվան նվիրված հանդիսավոր նիստին:
«Շնորհավորում եմ բոլորիս Ազգային անվտանգության ծառայության աշխատողի օրվա առիթով: Եվ հենց հատուկ եմ ընդգծում, որ շնորհավորում եմ բոլորիս, որովհետև Ազգային անվտանգության ծառայության կողմից իրականացվող գործառույթներն առնչվում են Հայաստանի Հանրապետության յուրաքանչյուր քաղաքացու, առանց բացառության, նրա անվտանգության շահերին: Ես բազմիցս եմ ասել, որ Մենք երկրի անվտանգությունն ապահովող մի քանի ինստիտուտներ, կառույցներ ունենք, և այդ կարևոր կառույցներից մեկն Ազգային անվտանգության ծառայությունն է: Որպես վարչապետ կարող եմ արձանագրել, որ նախորդ 1.5 տարվա ընթացքում Ազգային անվտանգության ծառայությունը կատարել է իր առջև դրված խնդիրը»,–ասել է Փաշինյանը:
Հայաստանում խաբել են ՌԴ–ի և Ղազախստանի քաղաքացիներին. ԱԱԾ–ի նոր բացահայտումը
Նա նշել է, որ ԱԱԾ հասցեին հնչող քննադատությունների ֆոնին պետք է արձանագրել մի բան, որ ԱԱԾ գործունեության մի զգալի մասը անտեսանելի է հանրության համար: «Երբ անվտանգությունը կա, սովորաբար այդ անվտանգության առկայության համար շնորհակալություն ոչ ոք ոչ մեկին չի ասում, որովհետև դա համարվում է մի բան, որ ինքնին ենթադրվում է, ինքնին ներկա է և ինքնին պետք է լինի: Այն, որ անվտանգության ներկայությունը թեկուզ մի փոքր կասկածի տակ է առնվում, բնականաբար, բոլորը հանում են իրենց թրերը և հարձակվում այդ անվտանգությունն ապահովելուն ուղղված մարմինների ուղղությամբ: Ես ուզում այս առիթն օգտագործելով շնորհակալություն հայտնել ԱԱԾ-ին, նրա բոլոր աշխատակիցներին իրենց կատարած ծառայության համար»,–ասել է նա:
Վարչապետը ցավով է նշել, որ Հայաստանի Հանրապետությունը դեռևս այնպիսի անվտանգային միջավայրում չէ, որպեսզի հնարավորություն ունենանք ընդհանրապես չնկատել անվտանգության հետ կապված խնդիրները, անվտանգության ներկայությունը: «Մենք անվտանգության երկարաժամկետ մարտահրավերներ ենք ունենալու, ընդ որում՝ կապված նաև միջազգային, տարածաշրջանային իրավիճակի հետ, սկսած ահաբեկչության, մեր սահմանների անվտանգության մարտահրավերներից և այլն, և այսպես շարունակ: Բայց ես ուզում եմ ընդգծել, որ այսօր ամենավերջին տվյալներով, Հայաստանի Հանրապետությունը տեղ է զբաղեցրել աշխարհի անվտանգ երկրների ցանկում: Եվ պատկերացնում եք, հակամարտություն ունեցող, չորս սահմանից 2 փակ սահման ունեցող երկիրը հանկարծ հայտնվում է աշխարհի անվտանգ երկրների շարքում: Սրանք բաներ են, որոնք, ցավոք, շատ դեպքերում չի նկատվում»,–ասել է կառավարության ղեկավարը:
Դավիթ Սանասարյանի հաղորդումը շորթման մասին` չի հաստատվել. գործը կարճվել է
Կառավարության ղեկավարի խոսքով՝ այս ընթացքում բազմաթիվ քննարկումներ, դիտարկումներ են եղել, թե ինչքանով է ինքը՝ որպես ՀՀ վարչապետ, վստահում ԱԱԾ-ին, այն ԱԱԾ-ին, որը գործել է այն ժամանակներում նաև, երբ ինքը եղել է ընդդիմադիր քաղաքական գործիչ, դրանից առաջ՝ քաղբանտարկյալի կագավիճակում: «Բնականաբար, տարբեր ժամանակներում իրավապահ համակարգը, այդ թվում ԱԱԾ-ն, աշխատում է տարբեր պայմաններում, տարբեր միջավայրերում: Բայց ուզում եմ ասել, որ նույնիսկ այն ժամանակներում ԱԱԾ-ն և իր գործունեության հասկանալի նրբություններով երբեք չի անցել այն կարմիր գծերը, որոնք ընդհանրապես կարող են գոյություն ունենալ հանրային հարաբերություններում:
Եվ ես, այո՛, նաև այդ պատճառով, այո՛, նաև այսօր՝ որպես ՀՀ վարչապետ, վստահում եմ Հայաստանի Հանրապետության ազգային անվտանգության ծառայությանը, որովհետև դա նաև իմ պատկերացումն է, որ ԱԱԾ-ն չպիտի լինի որևէ իշխանության գործունեության համատեքստում տեղավորվող ծառայություն: ԱԱԾ-ն բառիս բուն իմաստով ազգային անվտանգության ծառայություն պետք է լինի առանց բացառության բոլոր իշխանությունների գործունեության ժամանակ»,–իր խոսքում նշել է ՀՀ վարչապետը` հավելելով, որ ԱԱԾ–ի գործունեությունը` իր բոլոր նրբություններով առանց որևէ մի տոկոսային վերապահման, համապատասխանում է Հայաստանի Հանրապետության ազգային անվտանգության շահերին, ազգային շահերին, պետական շահերին։
«Թույլ չեմ տա, որ կեղծ իրավապաշտպանները վնասեն ՀՀ–ի անվտանգությանը». Վանեցյան
«Եվ ես կարծում եմ, որ մեր մեծագույն խնդիրն է նաև, որ մենք առաջիկա տարիներին շատ հավասարակշռված քայլերով այնպիսի բարեփոխումներ իրականացնենք ԱԱԾ-ում, որ նրա գործունեությունը դառնա առավել արդյունավետ: Եվ մասնավորապես, այո՛, ես համաձայն եմ բոլոր այն դիտարկումների հետ, որ ժամանակի ընթացքում ԱԱԾ-ն գուցե ավելի պակաս ջանք պիտի գործադրի կոռուպցիայի դեմ պայքարում, որովհետև դրա համար պետք է ձևավորվեն առավել արդյունավետ ինստիտուտներ և ԱԱԾ-ն պետք է կենտրոնանա մասնավորապես, հակահետախուզության խնդիրների վրա, պետք է կենտրոնանա ահաբեկչության դեմ պայքարի խնդիրների վրա, պետք է կենտրոնանա սահմանադրական կարգի պահպանության և բռնության բացառման խնդիրների վրա»,–ասել է Փաշինյանը:
Ազգային անվտանգության մարմինների աշխատողի օրվա կապակցությամբ ծառայողական պարտականությունները կատարելիս ցուցաբերած խիզախության և նվիրումի համար ԱԱԾ մի խումբ աշխատակիցներ պարգևատրվել են պետական պարգևներով և մեդալներով, վարչապետի հուշամեդալով և շնորհակալագրերով:
