Այս պահին Հանրապետության հրապարակում և Երևանի հիմնադրման 2750-ամյակի այգում վերջին շտկումներն են կատարվում երեկոյի տոնական միջոցառումների համար։ Այս մասին Sputnik Արմենիայի հետ զրույցում ասաց Երևանի փոխքաղաքապետ Տիգրան Վիրաբյանը։ Նրա խոսքով` ամեն ինչ պատրաստ է, և ընդամենը մի քանի ժամից տեղի կունենա հանրապետության գլխավոր տոնածառի լույսերի վառման արարողությունը, որը կուղեկցվի հետաքրքիր տոնական մյուզիքլով։ Դրանից հետո տոնական միջոցառումները կշարունակվեն Երևանի հիմնադրման 2750-ամյակի այգում. այստեղ տեղի կունենա Ամանորի և Սուրբ Ծննդյան տոնավաճառի բացումը, որը կշարունակվի համերգային ծրագրով։
Վիրաբյանը խոստանում է, որ այսօրվանից մինչև հունվարի 13-ն ամեն օր այգում համերգային ծրագրեր, հետաքրքիր երեկոներ են լինելու, լավ երաժշտություն է հնչելու։
«Ես վստահ եմ, որ այգին ամանորյա այս իրարանցման ժամանակ դառնալու է երևանցիների և մայրաքաղաքի հյուրերի ամենասպասված ու սիրված վայրը»,– ասաց Վիրաբյանը։
Փոխքաղաքապետն անդրադարձավ նաև հնչող քննադատություններին, որ քաղաքի Ամանորյա ծախսերը խիստ չափազանցված են։
Ամանորի սեղանները կարող են մնալ առանց բանանի. որքանով է անվտանգ Հայաստան ներկրվողը
«Կարծում եմ, որ երևանցիները, մայրաքաղաքի հյուրերը արժանի են, որպեսզի ունենան նման մոտեցմամբ, նման ուշադրությամբ պատրասված միջոցառումների շարք»,– ասաց Վիրաբյանը` վստահություն հայտնելով, որ երևանցիներն ու հյուրերն իրենց ավելի շոյված կզգան, երբ տեսնեն այն ամենը, ինչը կազմակերպվել է իրենց համար։
Հիշեցնենք, որ այսօր 20։00-ին կվառվեն Հանրապետության հրապարակում տեղադրված գլխավոր տոնածառի լույսերը։
Երբ և որ փողոցները փակ կլինեն Երևանում. պատրաստվում ենք Ամանորին
Հավելենք, որ Երևանի քաղաքապետարանը 325 միլիոն դրամ (շուրջ 677 հազար դոլար) կծախսի Նոր տարվա միջոցառումների համար, որից 271 միլիոնը կառավարությունն է տրամադրել, 54 միլիոնն էլ ընթացիկ բյուջեով է հատկացվել։ Նախատեսված ծախսերը հասարակությունը որ միանշանակ է ընդունել, հնչել են նաև սուր քննադատություններ։
