ԵՐԵՎԱՆ, 17 փետրվարի — Sputnik. ՀՀ վարչապետի տիկին Աննա Հակոբյանը ցավակցություն է հայտնել լուսանկարիչ Գերման Ավագյանի ընտանիքի անդամներին և հարազատներին, ընկերներին և նրա արվեստը գնահատող հազարավոր մարդկանց։
«Խորը վշտով տեղեկացա մեր լավ ընկեր, հայտնի լուսանկարիչ-վավերագրող Գերման Ավագյանի անժամանակ մահվան մասին։ Գերմանի հեռանալով մեր հասարակությունը կորցրեց յուրահատուկ մի գույն, սրտացավ քաղաքացի և ուրույն ձեռագրով լուսանկարիչ»,– գրում է Աննա Հակոբյանը։
Նա նաև նշում է, որ Ավագյանը մեր պատմության վավերագրողն էր, որի լուսանկարներից են նաև հետագա սերունդներն իմանալու նորանկախ Հայաստանի մասին։
«Լույս իջնի շիրիմիդ, սիրելի Գերման»,– գրում է վարչապետի տիկինը։
Լուսանկարիչ, վավերագիր ու լրագրող Գերման Ավագյանի մահվան լուրը տարածվեց երեկ երեկոյան։ Նա հանկարծամահ է եղել սրտի կաթվածից։ Մահվան գույժը սոցցանցի իր էջում հայտնել էր լուսանկարչի մտերիմ ընկեր, քանդակագործ Սահակ Պողոսյանը։
Գերման Ավագյանը ծնվել է 1962 թվականի դեկտեմբերի 12-ին Վրաստանում։ 1974-1978 թվականներին բնակվել է Գերմանիայի Դեմոկրատական Հանրապետությունում: 1979-1980 թվականներին սովորել է Բելառուսիայի Շուչին քաղաքում, 1980-1985 թվականներին՝ Երևանի պոլիտեխնիկական ինստիտուտում: 1989 թվականից որպես ազատ լուսանկարիչ համագործակցել է տարբեր պարբերականների հետ։ Հրապարակվել է հայկական և արտասահմանյան պարբերականներում։ Բազում մրցանակներ և պարգևներ ունի լուսանկարչական ու լրագրողական գործունեության համար։
