ԵՐԵՎԱՆ, 5 մարտի — Sputnik. ՀՀ պաշտպանության առաջին նախարար Վազգեն Սարգսյանի եղբայրը` Արամ Սարգսյանն այսօր «Եռաբլուրում» լրագրողներին ասաց, որ եղբոր երազած Հայաստանում պետք է լուծված լիներ Արցախի հարցը, և այն պետք է լուծված լիներ հօգուտ Հայաստանի։
Այսօր Վազգեն Սարգսյանի ծննդյան օրն է, քաղաքացիներն ու պաշտոնյաներն այցելել են «Եռաբլուր» պանթեոն։
«Վազգենն իր կյանքն ու ամբողջ գործունեությունը նվիրեց Արցախի խնդրին, նա մինչև 1998–ի վերջը զինվոր էր։ Եղբորս կենդանության ժամանակ որևէ մեկը նրան սպարապետ չէր կոչում և չէր էլ կարող կոչել, քանի որ նա համեստ մարդ էր։ Նա համարում էր, որ իրենցից յուրաքանչյուրը, որն իր կյանքը տվեց կամ ողջ մնաց Արցախյան ազատամարտի ժամանակ, ամենակարևոր մարդկանցից էր»,–ասաց Արամ Սարգսյանը։
Նրա խոսքով` եղբայրը լավագույն բնորոշումն է տվել Արցախյան ազատամարտին իր մասնակցության մասին` ասելով, թե պատերազմին տվել է ինչ կարող է ու փոխարենը ձեռք է բերել հպարտություն։
Հարցին, թե ինչպես էին անցնում նրա ծննդյան օրերը, Սարգսյանը պատմեց, որ եղբայրը չէր սիրում դրանք տոնել։ Ավելին, երբ կենացներ էին ասում, հատկապես խմում էին իր կենացը, կա՛մ խնդրում էր, որ դա չանեին, կա՛մ սկսում էր երգել։
Նշենք, որ «Եռաբլուր» են այցելել ՀՀ նախագահ Արմեն Սարգսյանը, իշխող կուսակցության ներկայացուցիչները, Վազգեն Սարգսյանի մարտական ընկերները։
Վազգեն Սարգսյան. «Ով զոհվի, դավաճան է»
Սարգսյանն այսօր կդառնար 61 տարեկան։ Նա եղել է ՀՀ առաջին պաշտպանության նախարարը 1991-1992 թվականներին և այնուհետև 1995-1999 թվականներին: Եղել է Հայաստանի Հանրապետության վարչապետը 1999 թվականի հունիսի 11-ից մինչև իր սպանությունը՝ նույն թվականի հոկտեմբերի 27-ը, երբ մի խումբ անձինք ահաբեկչություն իրականացրին Ազգային ժողովում։
Սարգսյանին շնորհվել են Հայաստանի և Արցախի բարձրագույն կոչումները` Հայաստանի ազգային հերոս և Արցախի հերոս։
Երեք Հայաստան. Սարյանի դրոշն ու Վազգեն Սարգսյանի վերջին հրամանը
