Խոսքի ազատության պաշտպանության կոմիտեի նախագահ Աշոտ Մելիքյանը ցավով է նշում է, որ իրենց վատ կանխատեսումներն իրականացան․ կառավարության՝ արտակարգ դրության պայմաններում ԶԼՄ–ներին վերաբերող որոշումը շատ ոչ հստակ դրույթներ է պարունակում, որոնք կարող են կամայական գործողությունների առիթ դառնալ։
Ըստ նրա՝ վերջին օրերին ականատես ենք լինում, որ ոստիկանությունն է որոշում, թե տվյալ զանգվածային լրատվամիջոցի հրապարակումը կարո՞ղ է խուճապ առաջացնել, թե՞ ոչ, և ոստիկանությունն էլ պահանջում է հեռացնել դրանք։
«Սա շատ վատ նախադեպ է, և կարծում եմ, որ հայաստանյան լրատվամիջոցները դեռ երկար կարող են զգալ սրա հետևանքները։ Պետք է անհապաղ չեղյալ հայտարարել այդ սահմանափակումները` տեսնելով, որ դրանք իսկապես խոսքի ազատության լուրջ սահմանափակումների են հանգեցրել և կարող են առհասարակ վտանգել լրատվամիջոցների ազատ գործունեությունը»,– Sputnik Արմենիայի հետ զրույցում ասաց նա։
Մելիքյանի խոսքով` լրագրողական և իրավապաշտպան 11 կազմակերպություններ հայտարարություն են տարածել, որում ոչ միայն իրենց մտահոգությունն են հայտնել, այլև պահանջել են անհապաղ դադարեցնել այդ դրույթների կիրառումն ու վերանայել դրանք` նախապատրաստելով նոր պահանջներ, որոնք համահունչ կլինեն իրողություններին և կհամապատասխանեն ժողովրդավարական հասարակությանը։
Արտակարգ դրության ռեժիմի խախտումներ են արձանագրվել
«Իրավիճակն ամենևին էլ այնպիսին չէ ու չի կարող լինել այդպիսին, որ իշխանությունները դիմեն ծայրահեղ միջոցների։ Ամենամտահոգիչն այն է, որ ուժային կառույցն է զբաղվում լրատվամիջոցին ուղղություն ցույց տալու, հրապարակումը թույլ տալու կամ չտալու հարցով»,– նշեց Խոսքի ազատության պաշտպանության կոմիտեի նախագահը։
Ինչ սահմանափակումներ կլինեն Հայաստանում արտակարգ դրության ժամանակ
Նրա համոզմամբ` պետք է մեծ աշխատանք կատարել, որպեսզի կամայականությունները չշարունակվեն արտակարգ դրության ավարտից հետո, որովհետև որոշ կառույցների համար դա բավականին հաճելի զբաղմունք է և նրանց կարող է դուր գալ լրատվամիջոցներին ճնշելը, ուստի կարող են ԶԼՄ–ներին պահանջներ ներկայացնել նաև արտակարգ դրության ավարտից հետո։ Ըստ Մելիքյանի`արտակարգ դրությունից հետո կարելի է դատական կարգով վիճարկել շատ որոշումներ, և այս առումով լրագրողական հանրությունը մեծ աշխատանք է ունի անելու։
