Վարդան Ոսկանյանի դիտարկմամբ` Իրանի առողջապահական համակարգը Մերձավոր Արևելքում ամենազարգացածներից մեկն է, և, դատելով տեղեկատվությունից, իրանցիները հիվանդանոցների հետ կապված որևէ խնդիր չունեն։ Իրանը նաև դեղորայքի խոշոր արտադրող է և շատ դեպքերում նաև ինքնաբավ երկիր։
Իրանի նախագահ Հասան Ռոհանին հանդես է եկել ուղերձով և նշել, որ նույնիսկ պատժամիջոցների կիրառման պայմաններում իրենք ի վիճակի են դիմադրել և իրենց կարողությունների սահմաններում կառավարել երկիրը։
«Այդուհանդերձ վիրուսային այս համավարակն ազդում է նաև Իրանի ներքին իրավիճակի վրա, և տվյալ համատեքստում ակնհայտ է, որ պատժամիջոցները թողնում են բացասական հետևանքներ` հատկապես որոշ դեղամիջոցների ու բժշկական սարքավորումների հետ կապված։ Բնական է, որ իշխանությունները ձգտում են օգտվել ստեղծված իրավիճակից և փորձում են համավարակի պայմաններում հասնել Իրանի հանդեպ կիրառվող պատժամիջոցների չեղարկմանը, որոնք իրականության մեջ անիրավ են, անարդար ու զգալիորեն ազդում են ոչ թե երկրի քաղաքական իշխանության, այլ հասարակ իրանցիների ապրելակերպի վրա»,– Sputnik Արմենիայի հետ զրույցում ասաց իրանագետը։
Ինչ դեղերով են բուժում կորոնավիրուսով հիվանդներին. նախարարը պատմեց Հայաստանի փորձի մասին
Ոսկանյանի դիտարկմամբ` որոշ դեպքերում գործ ունենք տեղեկատվության աղճատման հետ, որովհետև զանազան ԶԼՄ–ներ Իրանի հանդեպ վարում են քարոզչական դիվականացման քաղաքականություն, և շատ դեպքերում Իրանի վերաբերյալ դրական տեղեկություններ չեն տարածվում, հետևաբար պետք է իրավիճակին նայել օբյեկտիվորեն։
«Իրանի ներսում կորոնավիրուսի համավարակն առաջացրել է որոշակի դժվարություններ, բայց կարծում եմ, որ իրանցիները կարողանում են հաջողություններ գրանցել` հաշվի առնելով նաև այն հանգամանքը, որ գործ ունենք 80 միլիոն բնակչություն ունեցող երկրի հետ։ Իրանցիները մոբիլիզացնելով նաև իրենց բանակային ռեսուրսները, հատկապես Իսլամական հեղափոխության պահապանների կորպուսի ռեսուրսները`կարողանում են որոշակի արդյունավետությամբ, թեև ոչ այնքան գոհացուցիչ, պայքարել համաշխարհային աղետի դեմ, որն իր արտացոլումն է գտել նաև Իրանում»,– նշում է իրանագետը։
Ոսկանյանը խնդրին անդրադառնում է մարդկային ու բարոյական հարթությունում։ Նրա կարծիքով` նման համավարակի և համաշխարհային համախմբման պայմաններում որևէ պատժամիջոցի կիրառում դադարում է լինել արդիական և ընդունելի, ինչը շատ կարևոր հանգամանք է, հետևաբար Իրանի նկատմամբ կիրառվող պատժամիջոցները պետք է հնարավորինս շուտ չեղարկվեն` անկախ այդ երկրի իշխանությունների հանդեպ ԱՄՆ–ի նախագահի վարչակազմի ունեցած տրամադրություններից։
Իրանագետի համոզմամբ` որևէ պատժամիջոց տեսանելի ապագայում չի կարող բերել Իրանի ներսում ամերիկամետ իշխանության ձևավորման։ Ըստ նրա` իրանցիները կատարում են միջուկային ծրագրով ստանձնած բոլոր պարտավորությունները, և գուցե համավարակը պատճառ դառնա, որ խաղաղության պայմաններում կողմերը գնան որոշակի զիջումների։
Կորոնավիրուսն ու աշխարհը. G20-ի երկրներից որ երկուսի ձեռքում է փրկության բանալին
