ԵՐԵՎԱՆ, 3 ապրիլի – Sputnik. ՀՀ պետական եկամուտների կոմիտեն հայտնում է, որ աշխատանքներ են տարվում Հայաստան-Վրաստան սահմանին բեռնատարների կուտակումները նվազեցնելու ուղղությամբ։
«Վերին Լարսի անցակետի բացվելուց հետո Վրաստանի մաքսային մարմինները կազմում են 30-ական ավտոմեքենաներից կազմված շարասյուներ և մի քանի ժամ պարբերականությամբ կազմակերպում բեռնատարների փոխադրումը Վրաստանի տարածքով՝ մինչև Վերին Լարսի անցումային կետ: Հայաստանի մաքսային մարմինները 24/7 ռեժիմով օպերատիվ կապի մեջ են Վրաստանի և Ռուսաստանի գործընկերների հետ», - տեղեկացնում է ՊԵԿ-ը։
Ներկա պահին դեպի Վերին Լարսի անցակետ տանող, Վրաստանի տարածքով անցնող ճանապարհը փակվել է եղանակային անբարենպաստ պայմանների պատճառով։
Հիշեցնենք` մարտին, եղանակային պայմաններով պայմանավորված, Վերին Լարսի անցակետը հիմնականում փակ է եղել, ինչի հետևանքով Բագրատաշենի անցակետում Հայաստանից դեպի այլ երկրներ ապրանքներ տեղափոխող բեռնատարների զգալի կուտակումներ են առաջացել՝ մոտ 800 տրանսպորտային միջոց։
