ԵՐԵՎԱՆ, 9 ապրիլի – Sputnik․ Անգլիայում ապրող Ալեքսանդր և Գևորգ Ձավարյան եղբայրները Լոնդոնում բժշկական դիմակների իրենց արտադրությունն են սկսել, որոնք անվճար բաժանում են բժիշկներին։ Այդ կերպ նրանք որոշել են կորոնավիրուսի տարածման դեմ պայքարում իրենց ներդրումն ունենալ։ Եղբայրներն արդեն գրավել են անգլիացիների սրտերը և հայտնվել Sky News հեռուստաալիքի եթերում։
Ալեքսանդրը 22 տարեկան է, նա ուսանող է, Գևորգը լոնդոնյան դպրոցի աշակերտ է։
Ինչպես հայտնում է Sky News-ի տեսանյութը՝ Ձավարյանները բառացիորեն արտադրամաս են ստեղծել արտակարգ իրավիճակի պատճառով դատարկված դպրոցում։ Գործին միացել է նրանց ընկերը՝ Ֆինլեն Ուայթը։ Դիմակների արտադրության համար նրանք օգտագործում են իրենց դպրոցի 3D տպիչները։
Տղաները դիմակների արտադրության աշխատանքներն սկսել են անցած շաբաթ։ Դիմակների առաջին խմբաքանակը՝ 90 հատ, ուղարկվել է Ուելսի հիվանդանոցներից մեկը։ Նոր խմբաքանակ ստանալու խնդրանքով նրանց արդեն դիմել են Լոնդոնի, Լիվերպուլի և Շոտլանդիայի հիվանդանոցներից։
Նշենք, որ Մեծ Բրիտանիան նոր SARS-CoV-2 կորոնավիրուսով վարակվածների թվով առաջին տասնյակում է՝ 9-րդ հորիզոնականում։ Ապրիլի 8-ի դրությամբ աշխարհում կորոնավիրուսով վարակվածների թիվը հասել է 1 միլիոն 431 հազար 973-ի։
Ալեքսիս Օհանյանը հայկական կոնյակ է պահում կարանտինի ավարտի համար. երկար կենաց է ասելու
Առողջապահության համաշխարհային կազմակերպությունը(ԱՀԿ) նոր COVID-19 կորոնավիրուսի բռնկումը հայտարարել է համավարակ։ Կազմակերպությունը բոլոր պետություններին կոչ է արել միավորվել վարակի դեմ պայքարում։
