ԵՐԵՎԱՆ, 13 ապրիլի — Sputnik. ՀՀ արդարադատության նախարար Ռուստամ Բադասյանն այսօր կառավարության նիստում, ներկայացնելով արտակարգ դրության ռեժիմի ժամանակ գործող փոփոխությունները, հայտնեց, որ ճանապարհատրանսպորտային կանոնները խախտելու ու կայանատեղիների տուրքը չվճարելու տուգանքները չեն գանձվի մինչև արտակարգ դրության ռեժիմի ավարտը՝ մայիսի 14-ը։
Մայիսի 14-ից հետո այդ տուգանքներն ամբողջ ծավալով կգանձվեն։
Նախագիծը ենթադրում է նաև սեփականության իրավունքի սահմանափակումներ՝ ոչ կամավորության հիմքով, եթե դա բխում է արտակարգ դրության իրավական ռեժիմն ապահովող միջոցառումներ կիրառելու նպատակներից: «Օրինակ՝ հիվանդներին կամ ռիսկային խմբում գտնվող անձանց որևէ տարածքում տեղակայելու անհրաժեշտություն», - ասաց նախարարը:
Կառավարության նախագծով ուժը կորցրած է ճանաչվում ԶԼՄ–ների սահմանափակումներին վերաբերող գլուխը։
«Եթե հետագայում մոնիտորինգը ցույց տա, որ այսպես կոչված ֆեյքային նորությունները լայն ծավալում կստանան, մենք կառավարության որոշմամբ կարող ենք վերադառնալ և կիրառել նույն սահմանափակումները», - ասաց նախարարը:
ՀՀ վարչապետ Նիկոլ Փաշինյանն էլ իր հերթին նշեց, որ կառավարությունն առաջարկել է խորհրդարանին այսօր հատուկ նիստ գումարել, որի ընթացքում ՀՀ պարետ, փոխվարչապետ Տիգրան Ավինյանը կներկայացնի ինչպես վերջին փոփոխությունները, այնպես էլ իրականացված աշխատանքը։
Արտակարգ դրության ռեժիմն անհրաժեշտ է երկարացնել՝ հիվանդության տարածումը սահմանափակելու համար։ Միաժամանակ պարետատունն ընդլայնել է թույլատրելի տնտեսական գործունեության շրջանակը։ Դա անհրաժեշտ է, որ մարդիկ կարողանան աշխատանքի գնալ, գումար ստանալ, իսկ ձեռնարկություններն էլ հարկեր վճարեն։
Իհարկե, որքան մարդկանց շփումը շատ է, այդքան ավելի մեծ է վարակվելու վտանգը։ Սակայն առողջապահության նախարարի հորդորներին խստորեն հետևելու դեպքում դեպքերը կպակասեն։
Հիշեցնենք՝ մարտի 16-ից ապրիլի 14-ը Հայաստանում հայտարարված արտակարգ դրության ռեժիմը երկարացվել է մինչև մայիսի 14-ը։ Կորոնավիրուսով վարակվածների թիվը հասել է 1039–ի։
