ԵՐԵՎԱՆ, 14 ապրիլի – Sputnik. ՀՀ վարչապետ Նիկոլ Փաշինյանը Facebook-ի ուղիղ եթերում հայտնեց, որ Հայաստանում երեկ կորոնավիրուսից մահվան ևս 2 դեպք է գրանցվել։
«Մահվան դեպքերի միջին տարիքը 74.8 է։ 54 առողջացման դեպք ենք ունեցել երեկ։ 786 ակտիվ դեպք կա, ակտիվ դեպքերի որոշակի նվազում կա»,–ասաց նա։
Փաշինյանի խոսքով` այս վիճակագրությունը ցույց է տալիս, որ հնարավորություն կա ջարդելու վարակի ողնաշարը։
Վարչապետը նշեց` լավ լուրերից ոչ թե պետք է մեր զգոնությունը թուլանա, այլ կրկնապատկվի ու քառապատկվի։ Նա ասաց, որ այս պահին դեռ չի կարող ասել, թե պիկն արդեն թիկունքում է։
Մարտունու ԲԿ-ի բժիշկների թեստավորման արդյունքները հայտնի են
685 թեստ են իրականացրել երեկ, որից դրական է եղել 28–ը։ Առաջին անգամ դրական դեպքերը կրկնակի քիչ են, քան առողջացման դեպքերը։
Վարչապետը հայտնեց նաև, որ այսօր հանձնարարական է տվել, որ պարետատունը և տեսչական մարմինը գործատուներին խորհրդատվություն տրամադրեն, թե ինչ հակահամաճարակային միջոցառումներ է անհրաժեշտ իրականացնել։
Հիշեցնենք՝ երեկվա դրությամբ Հայաստանում կորոնավիրուսով վարակվելու 1039 դեպք էր գրանցվել: Մահերի թիվը 14 էր, այժմ արդեն դարձավ 16:
