ԵՐԵՎԱՆ, 23 ապրիլի — Sputnik. ՀՀ պաշտպանության նախարարությունը տեղեկացնում է, որ ապրիլի 22-ին ՀՀ պաշտպանության նախարար Դավիթ Տոնոյանն աշխատանքային այցով եղել է հայ-ադրբեջանական պետական սահմանի հարավարևմտյան ուղղությամբ տեղակայված մարտական հենակետերում:
«Պաշտպանության նախարարին զեկուցվել է սահմանագոտում տիրող օպերատիվ-մարտավարական իրադրության, կատարված և ընթացիկ ինժեներական ու ամրաշինական, հենակետերի վերազինման աշխատանքների և թիկունքային ապահովման խնդիրների մասին: Պաշտպանական գերատեսչության ղեկավարը զրուցել է դիրքապահների հետ»,–նշված է հաղորդագրության մեջ։
Նախարարը դիրքապահներին հավաստիացրել է, որ անձնակազմի սոցիալ-կենցաղային պայմանների շարունակական բարելավման հետ կապված խնդիրները մշտապես գտնվում են երկրի ռազմաքաղաքական ղեկավարության ուշադրության կենտրոնում:
Տոնոյանը խրախուսել է բարձր լեռնային բարդ պայմաններում մարտական հերթապահություն իրականացնող զինծառայողներին և շնորհակալություն հայտնել գերազանց ծառայության համար:
Պաշտպանության նախարարն ունկնդրել է նաև զորամիավորման և զորամասերի հրամանատարների զեկույցները ստորաբաժանումների առջև դրված խնդիրների կատարման, անձնակազմի մարտական և բարոյահոգեբանական պատրաստության մակարդակի բարձրացմանն ուղղված աշխատանքների մասին։ Նա տվել է համապատասխան հանձնարարականներ և ցուցումներ:
Հիշեցնենք, որ ԶՈւ–ում նույնպես արձանագրվել են կորոնավիրուսի վարակման դեպքեր, սակայն վարակված զինծառայողների մի մասը առողջացել և վերադարձել է ծառայության։
