Կամերային երաժշտական թատրոնի դերասանուհի Անահիտ Կիրակոսյանն այսօր յուրահատուկ ձևով է շնորհավորել երևանյան հյուրանոցներից մեկում մեկուսացված հոր` Ալեքսանդր Կիրակոսյանի 61–ամյակը։
Անահիտին միացել են երեխաները, քույրերն ու նրանց զավակները, ինչպես նաև մայրը։ Նրանք հավաքվել են հյուրանոցի դիմաց, Անահիտը կիթառ է նվագել, ու բոլորով երգել են ավանդական «Happy birthday»–ը։ Հետո նրանց է միացել հյուրանոցում գտնվող բուժաշխատողներից մեկը։ Այնպես որ խորհուրդ ենք տալիս Sputnik Արմենիայի տեսանյութը դիտել մինչև վերջ։
Անահիտը մեզ պատմեց, որ ստեղծված իրավիճակում նման կերպ հայրիկին շնորհավորելը լավագույն լուծումն էր։ Նախապես թղթերի վրա գրել են շնորհավորանքն ու դրել գետնին, որպեսզի հայրը վերևից տեսնի։
Հարազատները նաև ծաղիկներ են տարել, սակայն հյուրանոցից տեղեկացրել են, որ հորը փոխանցել չեն կարող. չի կարելի։ Ծաղիկները դրել են գետնին` թղթերի վրա։
Դերասանուհին համոզված է, որ իրենց քայլը ոչ միայն հայրիկին է ուրախացրել, այլև մյուս մեկուսացվածներին, որոնք պատուհանից են հետևել յուրօրինակ շնորհավորանքին։
Նշենք, որ Անահիտ Կիրակոսյանի հայրն աշխատում է Հայաստանի արտադրական ձեռնարկություններից մեկում, ու քանի որ այնտեղ կորոնավիրուսի դեպք է գրանցվել, աշխատակիցների մի մասին մեկուսացրել են հյուրանոցում։
Ինչպես կարող է ձվի կճեպը դեպրեսիան հաղթահարելու միջոց դառնալ, կամ խենթերի ժամանակը
