ԵՐԵՎԱՆ, 3 մայիսի – Sputnik. Տեղաշարժի սահմանափակումները մեղմելուց, տնտեսական գործունեության որոշ տեսակներ վերաբացելուց հետո ներդրվելու է ինքնամեկուսացման կանոնների ավելի խիստ հսկողության նոր համակարգ: Այս մասին այսօր հայտնեց ՀՀ փոխվարչապետ, պարետ Տիգրան Ավինյանը՝ ՀՀ վարչապետ Նիկոլ Փաշինյանի և առողջապահության նախարար Արսեն Թորոսյանի հետ ուղիղ եթերում հրավիրած քննարկման ժամանակ:
«Մենք կիրառելու ենք մեր տեղորոշման գործիքների հնարավորությունները, ինչպես նաև նոր միավորներ ենք ստեղծելու, որոնք այցելելու են ինքնամեկուսացվածներին: Նրանք պետք է ապահովեն, որ ինքնամեկուսացման ռեժիմը պահպանվի»,- ասաց Ավինյանը:
Պարետի խոսքով՝ դա հնարավորություն կտա մարդկանց ինքնամեկուսացնել առանց հյուրանոցներում տեղավորելու:
Մեկ տարի փակված մնալ հնարավոր չէ. Փաշինյանը, պարետն ու նախարարը՝ հետագա քայլերի մասին
Ավինյանը հիշեցրեց, որ ինքնամեկուսացվածի կարգավիճակում են այն անձինք, որոնք շփում են ունեցել վարակակրի հետ, բայց ներկա պահին հիվանդության ախտանշաններ չունեն:
