ԵՐԵՎԱՆ, 18 մայիսի - Sputnik. Աշխարհահռչակ ֆրանսահայ շանսոնյե Շառլ Ազնավուրի որդին՝ Նիկոլա Ազնավուրը, արձագանքել է Հանրային խորհրդի հրապարակմանը, ըստ որի՝ այս տարվա հունվարին «Ազնավուր» հիմնադրամի համահիմնադիր և հոգաբարձուների խորհրդի նախագահ Նիկոլա Ազնավուրը նամակով դիմել է Հայաստանի Հանրապետության վարչապետ Նիկոլ Փաշինյանին՝ «Զվարթնոց» օդանավակայանը Շառլ Ազնավուրի անունով կոչելու հարցով։
Հիմնադրամը հստակեցնում է՝ տարեսկզբին Նիկոլա Ազնավուրը նամակով դիմել էր վարչապետին ոչ թե օդանավակայանի անվանափոխության առաջարկով, այլ արձագանքել էր արդեն իսկ մեկնարկած նախաձեռնությանը։ Հիմնադրամը հրապարակել է Նիկոլ Փաշինյանին ուղղված նամակից մի հատված.
«2018 թվականին, երբ հայրս հեռացավ կյանքից, մենք տեղեկացվել էինք այն մասին, որ անվանափոխությանն ուղղված մեծ արշավ է սկսվել, և «Ազնավուր» հիմնադրամն էլ բազում նամակներ էր ստանում՝ դրա հետ կապված։ Մեր ընտանիքը սգի մեջ էր, և այդ օրերին մենք որևէ կերպ չենք արձագանքել նմանօրինակ նամակներին ու հայտարարություններին։ Վերջերս, սակայն, տեղեկացանք, որ հունվարի 11-ից նույն նախաձեռնության նոր ալիք է բարձրացել. լրատվամիջոցներում և սոցիալական մեդիայում բուռն քննարկվում է առաջարկը ու քվեարկության դրվում՝ պարզելու հանրության վերաբերմունքն այդ հարցի շուրջ։
Նիկոլա և Քրիստինա Ազնավուրները երգում են Լևոն Օգանեզովի նվագակցությամբ. տեսանյութ
Ուսումնասիրելով լրատվամիջոցների հրապարակումները, քննարկումներն ու այլ հայտարարություններ հարցի շուրջ՝ մեզ համար պարզ դարձավ, որ մարդիկ շատ դրական են վերաբերվում անվանափոխությանը, բայց ունեն նաև համակրանք և մեծ կապվածություն «Զվարթնոց» անվան հետ»,- նշված է եղել նամակում։
Հիմնադրամն առաջարկել էր ըստ իրենց` լավագույն տարբերակը՝ օդանավակայանը պահպանի «Զվարթնոց» անվանումը, բայց նաև ավելանա Շառլ Ազնավուրի անունը՝ «Շառլ Ազնավուրի անվան Զվարթնոց միջազգային օդանավակայան»։ Նամակում աշխարհի տարբեր երկրներից բազմաթիվ օրինակներ էին ներկայացված, որտեղ միջազգային օդանավակայանը նման անուն ունի՝ Փարիզի «Շառլ դը Գոլը», Շերեմետևոյի «Պուշկին» միջազգային օդանավակայանը, Հռոմ-Ֆյումիչինո «Լեոնարդո դա Վինչի» միջազգային օդանավակայանը, Վարշավայի «Ֆրեդերիկ Շոպեն» օդանավակայանը, Ռիո դե Ժանեյրոյի «Անտոնիո Կառլոս Ջոբիմ/Գալեաո» միջազգային օդանավակայանը, Հումբերտո Դելգադոյի անվան Լիսաբոնի օդանավակայանը, Բարսելոնայի Ժոզեֆ Թարադելլասի օդանավակայանը և այլն։
«Շառլը»՝ Հոլիվուդում. ամերիկացիներն առաջինը կտեսնեն Ազնավուրի կյանքի մասին մյուզիքլը
«Տեղյակ եմ, որ անվանակոչություների համար կառավարությանը հարկավոր է ընտանիքի անդամների և հեղինակային իրավունքները տնօրինողների համաձայնությունը։ Սույն նամակով ցանկանում եմ հայտնել մեր պատրաստակամությունն ու աջակցությունը «Զվարթնոց» օդանավակայանի անվանմանը Շառլ Ազնավուրի անունն ավելացնելու նախաձեռնությանը։ Մենք վստահ ենք, որ նոր անունն է՛լ ավելի մեծ միջազգային հետաքրքրություն կբերի Հայաստանին՝ օգնելով աշխարհում Հայաստանի առաջխաղացմանը», - ասված է եղել Նիկոլա Ազնավուրի նամակում:
«Ազնավուր» հիմնադրամը ևս մեկ անգամ շեշտում է, որ Նիկոլա Ազնավուրն օդանավակայանը անվանափոխելու կոչով չի դիմել, այլ հայտնել է ընտանիքի դրական դիրքորոշումն այդ հարցի վերաբերյալ: Ազնավուրների ընտանիքը կարևորում է հանրային կարծիքը և կարծում է, որ հարցի լավագույն լուծումը կլինի հին անվանման զուգակցումը նորի հետ՝ միջազգային փորձին հետևելով:
«Բոլոր հայերն իմ ընտանիքի անդամներն են». Ազնավուրը` հայերի ու իր հայկական ինքնության մասին
