ԵՐԵՎԱՆ, 23 մայիսի - Sputnik. Այս տարվա սեպտեմբերի 1-ից Արցախում բարձրագույն կրթությունը կդառնա անվճար։ Արցախի Հանրապետության նորընտիր նախագահ Արայիկ Հարությունյանը Facebook-ի իր էջում շնորհավորել է հանրապետության բոլոր շրջանավարտներին «Վերջին զանգի» առիթով և տոնական անակնկալ լուրը հաղորդել.
«Մեր նախընտրական խոստման համաձայն՝ սեպտեմբերի 1-ից Արցախում բարձրագույն կրթությունը կդառնա անվճար: Սակայն մեկ անգամ ևս հաստատում եմ, որ կրթության որակի նկատմամբ խիստ են լինելու նաև պետության պահանջները: Հետևապես, սովորելու և անընդհատ կատարելագործվելու ցանկությունը թող երբեք չլքի ձեզ»,- գրել է նախագահը:
Իր շնորհավորական ուղերձում նա նշել է, որ աշխարհին պատուհասած համավարակը այս տարի բոլորին զրկել է «Վերջին զանգի» տոնական միջոցառման կազմակերպումից: Սակայն ինքը համոզված է, որ դրա հետևանքով առաջացած հիասթափությունը որևէ կերպ չի խանգարելու, որ յուրաքանչյուրն իր առջև դրված նպատակներին հասնելու համար անհրաժեշտ ջանքեր գործադրի:
Փաշինյանը հայտնել է Հայաստանի և Արցախի ղեկավարների նոր պայմանավորվածության մասին
«Մի՛ մոռացեք, որ ցանկացած ճգնաժամ նաև հնարավորություն է: Դպրոցն ավարտելուց հետո ձեր կյանքում սկսվում է շատ կարևոր մի շրջափուլ, որտեղ որակի ու արդյունավետության չափման միավորները կրկին գիտելիքների մակարդակն ու ցուցաբերած հմտություններն են լինելու: Ուստի, ինչ մասնագիտություն էլ կյանքում ընտրելու լինեք, միշտ հիշեք, որ ձեր ոլորտում պետք է լինեք առաջատարը»,- նշել է Արցախի նախագահ Արայիկ Հարությունյանն ու մաղթել, որ բոլորի երազանքներն ու մտահղացումներն իրականանան հանուն նրանց անհատական և բոլորիս հավաքական հաջողությունների:
Նախագահական ընտրությունների երկրորդ փուլում նրա հետ մրցակցության մեջ մնացել էր ԱՀ արտգործնախարար Մասիս Մայիլյանը։
«Արցախը Հայաստան է, և վերջ». Արայիկ Հարությունյանը հուզիչ պատմություն պատմեց
