ԵՐԵՎԱՆ, 2 հունիսի - Sputnik. Գյումրիում ծեծի ենթարկված 13-ամյա Նազելի Խաչատրյանը կապրի հորաքրոջ հետ։ Spitnik Արմենիայի հետ զրույցում տեղեկությունը հայտնեց Գյումրու համայնքապետարանի խնամակալության և հոգաբարձության մարմնին կից Խնամակալության և հոգաբարձության հանձնաժողովի նախագահ Էդվարդ Բաղրամյանը` հայտնելով, որ այսօր հանձնաժողովի նիստ է տեղի ունեցել ու նման որոշում կայացվել։
Դեռ մարտի 5-ին Գյումրու Պռոշյան փողոցի տներից մեկում հայտնաբերվել էր 43-ամյա Մարինե Խ.-ի դիակը՝ բռնության հետքերով: Նույն տնից «տրավմային շոկ, գանգուղեղային փակ վնասվածքով» հիվանդանոց էր տեղափոխվել նրա 13-ամյա դուստրը` Նազելի Խաչատրյանը: Ամիսներ անց Նազելիի բուժումն իր արդյունքը տվեց. երեկ «Սուրբ Աստվածամայր» ԲԿ–ից հայտնեցին, որ երեխան արդեն լիովին բուժվել է, սակայն մի քանի օր էլ կմնա հիվանդանոցում` մինչև նրա խնամակալության հարցը լուծվի։
«Նիստի ժամանակ Նազելիի խնամակալության ու հոգաբարձության իրավունք է տրվել հորաքրոջը, որը նման դիմում էր ներկայացրել։ Աղջկա եղբայրը նույնպես նրանց հետ կապրի. տղան Հայաստանից նորից Ռուսաստան գնալու ցանկություն չունի»,–ասաց Բաղրամյանը։
Նրա խոսքով`հորաքույրը, որի հետ կապրեն երեխաները, Նազելիենց տան հարևանությամբ է ապրում և դեռ կորոշեն` հորաքրո՞ջ, թե՞ հենց Նազելիենց տանն էլ կապրեն բոլորով։ Երեխաների խնամքը ստանձնող կինը նույնպես ունի երեխաներ, բայց, ըստ Բաղրամյանի, նրանք արդեն ամուսնացել են ու յուրաքանչյուրն իր ընտանիքն ունի։
Շուտով կլուծվեն երեխաների թոշակի և նպաստի հարցերը և ընտանիքը սոցիալական խնդիրներ չի ունենա։ Ի դեպ` հորաքրոջ` սկզբնական շրջանում Նազելիի խնամակալը դառնալուց հրաժարվելու պատճառներից մեկն էլ հենց սոցիալական հարցն է եղել։
Բաղրամյանը հայտնեց նաև, որ արդեն իսկ պայմանավորվածություն է ձեռք բերվել «Սուրբ Աստվածամայր» ԲԿ–ի ղեկավարության հետ, որ աղջկան երկու օրից տուն տանեն։
Օրինակելի վարքով, աշխույժ երեխա է. Գյումրիում ծեծված աղջնակը մնացել է առանց խնամակալի
«Բուժման ողջ ընթացքում երեխայի հետ հոգեբաններն աշխատել են։ Մենք էլ վերահսկելու ենք նրան և հորաքրոջն էլ ասել ենք այդ մասին։ Եթե կարիք լինի, մեր մասնագետները կզբաղվեն նրանով, սակայն այս պահի դրությամբ երեխան իրեն լավ է զգում»,–ասաց Բաղրամյանը։
Նա նշեց նաև, որ Նազելիի եղբոր խնդրով նույնպես զբաղվել են` տղան նախորդ տարի տեղի տարածաշրջանային քոլեջից դուրս է մնացել ինչ–ինչ պատճառներով, սակայն քոլեջի տնօրենի հետ կա պայմանավորվածություն, որ վերականգնեն նրա տեղը։
Նազելիի եղբայրը ծրագրավորում է սովորել, ու Բաղրամյանը վստահեցնում է` ամեն ինչ անելու են, որ նա ավարտի քոլեջը։
Ինչ վերաբերում է Նազելիի` դպրոցում ուսումը շարունակելուն, ապա դպրոցի տնօրեն Հասմիկ Անդրիասյանը հայտնեց, որ աղջիկն այս ընթացքում մասնակցել է հեռավար դասերին` կրթությունից դուրս չի մնացել և հաջորդ դասարան տեղափոխվելու խնդիր չունի։
«Երբ Նազելիին առաջարկեցի մասնակցել հեռավար դասերին, նա շատ ոգևորվեց։ Ճիշտ է, նա գերազանցիկ չէ, բայց լավ է սովորում։ Վստահ եմ, որ դպրոց փոխելու հարց չի առաջանալու, և Նազելին հենց իր դասարանում էլ շարունակելու է ուսումը։ Նրա հետ խոսելու ընթացքում էլ այդպես եմ համոզվել, բացի այդ, հորաքույրն էլ նույն տարածքում է ապրում»,–ասաց տիկին Անդրիասյանը։
Նա նշեց նաև, որ Նազելիի դասընկերները մշտապես կապի մեջ են եղել աղջկա հետ և անհամբեր սպասում են, թե նա երբ է տուն վերադառնալու։ Դպրոցի տնօրենն ասաց` կորոնավիրուսային իրավիճակով պայմանավորված, ճիշտ է, շատ այցեր չեն լինի, բայց երկուական աշակերտներով կայցելեն Նազելիին։
Հիշեցնենք, որ Նազելիի մոր սպանության դեպքով հարուցված քրգործով մի երիտասարդ է կալանավորվել, որը նույն տարածքի բնակիչ է:
Հարևանների խոսքով` տղամարդն ինքն է դեպքի մասին մորը տեղեկացրել, մայրն էլ զանգել է շտապօգնություն:
Գյումրիում հայտնաբերվել է 43–ամյա կնոջ ծեծված դի. նրա 13–ամյա դուստրը հիվանդանոցում է
