ԵՐԵՎԱՆ, 9 հունիսի – Sputnik. Հատուկ քննչական ծառայության պետին որևէ մեկը չի կարող հանձնարարել ինչ–որ մեկի դեմ գործ հարուցել։ Ազգային ժողովում լրագրողների հետ զրույցում ասաց ՀՔԾ պետ Սասուն Խաչատրյանը` պատասխանելով հարցին, թե Վանեցյանի հետ կապված «բզբզալու» հանձնարարական ստացե՞լ է։
«ՀՔԾ պետին որևէ մեկը նման հանձնարարական չի կարող տալ»,–ասաց Խաչատրյանը։
Մեկ այլ հարցի, թե Վատիկանում ՀՀ նախկին դեսպան, ՀՀ երրորդ նախագահ Սերժ Սարգսյանի փեսա Միքայել Մինասյանի հայտարարության առնչությամբ, բացի Արթուր Վանեցյանից, այլ անձինք հարցաքննվե՞լ են, Խաչատրյանը պատասխանեց, որ անհրաժեշտ չի համարում բարձրաձայնել այդ մասին։
ՀՔԾ պետը, սակայն, վստահեցրեց, որ գործընթաց է գնում։
Իսկ ինչ վերաբերում է նախկին պաշտոնյաներին, որոնք այս կամ այն քրգործերով հետախուզման մեջ են, ապա Խաչատրյանը հիշեցրեց, որ հետախուզումն իրականացնում է ՀՀ ոստիկանությունը, իսկ վարույթն իրականացնող մարմինն օժանդակում է հետախուզողին հայտնաբերելու համար։
Խաչատրյանը հրաժարվեց մանրամասներ հայտնել, թե հետախուզվողներից որևէ մեկի հետ կապված ինչ տվյալներ ունեն` ասելով, որ դա գաղտնի գործընթաց է։
Վանեցյանն ու Մինասյանն ընդդեմ Փաշինյանի. արդյո՞ք ՀՀ վարչապետը մտահոգվելու պատճառ ունի
Հիշեցնենք՝ մայիսի 2-ին Facebook-ում հրապարակած տեսանյութում Մինասյանը պատմել էր, որ ԱԱԾ նախկին տնօրեն Արթուր Վանեցյանը վարչապետ Նիկոլ Փաշինյանի հանձնարարությամբ Հռոմում հանդիպել է իրեն ու առաջարկել սիմվոլիկ գումար վճարել հայաստանյան հիմնադրամներից մեկին, դադարեցնել պայքարը Փաշինյանի դեմ և այլևս Հայաստան չվերադառնալ: Դրանից հետ քրեական գործ էր հարուցվել Քրեական օրենսգրքի 308-րդ հոդվածի 1-ին մասով` պաշտոնեական դիրքը ծառայության շահերին հակառակ օգտագործելու համար։
Դատախազությունից հայտնել էին` Մինասյանի տեսանյութի վերաբերյալ նյութերը ուղարկվել են ՀՔԾ։
Միքայել Մինասյանը որպես մեղադրյալ է ներգրավվել Պետական եկամուտների կոմիտեի քննչական վարչությունում քննվող քրգործի շրջանակում:
Հունիսի 8-ին հայտնի դարձավ, որ նրա մեղադրանքն ավելացվել է նոր բացահայտումներով։
