Facebook-յան օգտատեր Ռոման Բաղդասարյանն իր էջում մի տեսանյութ է հրապարակել, որտեղ երևում է, թե ինչպես են «Բարգավաճ Հայաստան» կուսակցության շարքային անդամներն իրենց կուսակցական անդամատոմսերը նետում ջրատարը։
«Մեր դեմքը չնկարես հանկարծ»,–ասում է նրանցից մեկը նկարահանողին։
Կադրերում երևում է, որ ջրատարում մի քանի տասնյակ տոմս կա նետած։ Հավանաբար, այսպիսով նրանք իրենց անհամաձայնությունն են հայտնում ԲՀԿ–ի վարած քաղաքականությանը և սատարում գործող իշխանությանը։
Տեսանյութը բազմաթիվ մեկնաբանություններ ունի։ Օգատատերերից ոմանք կարծում են, որ այդ մարդիկ երևի տեղյակ էլ չեն եղել, որ իրենք ԲՀԿ անդամ են։ Իսկ նրանցից մեկը պատմում է, որ մի անգամ իրենց ընտանիքի անձնագրերը գյուղապետարան են տարել` պարարտանյութ ստանալու համար, իսկ հետ են ստացել ԲՀԿ–ի անդամատոմսերի հետ միասին։ Եղել են օգտատերեր, որ ենթադրել են, որ սա կարող է նաև սադրանք լինել։
Հիշեցնենք` հունիսի 16–ին ԱԺ–ն որոշեց «Բարգավաճ Հայաստան» կուսակցության նախագահ Գագիկ Ծառուկյանին զրկել անձեռնմխելիությունից և թույլ տալ, որ նրա նկատմամբ քրեական հետապնդում սկսվի։
ԱԱԾ-ն հունիսի 14-ին խուզարկություն էր իրականացրել Գագիկ Ծառուկյանի առանձնատանը: Նրա դեմ 3 քրեական գործ է հարուցվել։ Առաջին քրեական գործը վերաբերում է «Շանգրի Լա» և «Օնիրա Քլաբ» խաղատներին, որի համաձայն` դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին: Ըստ գործի նյութերի` ԲՀԿ-ն հարյուր հազարների ընտրակաշառք է բաժանել:
«Մենք իրենց կսովորեցնենք խոսելու ձևը». Փաշինյանը ներկայացրեց Ծառուկյանների քրգործերը
Իսկ երրորդ քրեական գործը վերաբերում է Կոտայքի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
Ով իր շահի մասին է մտածում, նա դավաճան է. Ծառուկյան
Հունիսի 16–ին ԱԱԾ-ն հանդես եկավ նաև չորրորդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին:
