ԵՐԵՎԱՆ, 1 հուլիսի – Sputnik. Հիվանդությունների վերահսկման և կանխարգելման ազգային կենտրոնն արդեն փորձարկել է հայկական թեստերը և 4 նմուշների պատրաստման եղանակներից երեքը երաշխավորել։ Պարետատան նիստից հետո կայացած ճեպազրույցի ժամանակ տեղեկությունը հայտնեց ՀՀ ԳԱԱ մոլեկուլային կենսաբանության ինստիտուտի տնօրեն Արսեն Առաքելյանը։
«Այդ երեք նմուշների պատրաստմամբ հայկական թեստերն ապահովում են բավական բարձր ճշտություն։ Ծրագրավորում ենք պլանավորել այնքան թեստեր, որոնք կբավարարեն Հայաստանում թեստավորման պահանջարկը։ Օրական 2000-2500 թեստ կարտադրվի»,–ասաց նա։
Առաքելյանի խոսքով` քանի որ փորձարկման պատասխանը կա, հիմա մնում է առողջապահության նախարարության հետ պայմանավորվածություն ձեռք բերեն, և հայկական թեստերը կհայտնվեն լաբորատորիաներում։
Առաքելյանը հայտնեց նաև, որ փորձարկել են ֆիզիկայի ինստիտուտի մշակած ախտահանիչ սարքերը, ինչպես ԳԱԱ քիմիական ֆիզիկայի ինստիտուտի մշակած ախտահանող նյութերը։ Նա հավելեց` շարունակում են գիտական հետազոտություններ անել և աշխատանքներ տանել այն քիմիական միացությունների հայտնաբերման ուղղությամբ, որոնք կարող են կորոնավիրուսի դեմ պայքարի համար դեղամիջոց դառնալ։
Հիշեցնենք, որ հայկական թեստերի արտադրանքի մասին խոսակցությունները սկսվել էին մարտից, իսկ անմիջապես արտադրությունը՝ մարտի 14-ից։
Հուլիսի 1-ի դրությամբ Հայաստանում կորոնավիրուսով վարակվել է 26 065 մարդ, որոնցից 14 563-ն առողջացել են, 453-ը` մահացել: Կորոնավիրուսային հիվանդության դեմ այս պահին փաստացի բուժում է ստանում 10 900 պացիենտ:
