ԵՐԵՎԱՆ, 2 հուլիսի – Sputnik. ՀՀ կառավարությունն այսօր կայացած նիստում որոշում է ընդունել Հայաստանի Հանրապետության հավաքական թիմերի կազմում բարձր արդյունքներ ցուցաբերած մարզիկներին և նրանց մարզիչներին անվանական թոշակներ հատկացնելու մասին:
Որոշման համաձայն` օլիմպիական, պարալիմպիկ խաղերում 1-ին տեղ զբաղեցրած մարզիկները կստանան ամսական 500 000, նրանց մարզիչները՝ ամսական 250 000 դրամ անվանական կենսաթոշակ, 2-րդ տեղը զբաղեցրած մարզիկներն ու նրանց մարզիչները՝ համապատասխանաբար 350.000 և 175.000 դրամ, 3-րդ տեղի համար՝ 300.000 և 150.000- ական դրամ, իսկ 4-6-րդ տեղերի համար մարզիկին կհատկացվի 100.000 դրամ, մարզչին՝ 50.000:
Նույն գումարները կստանան նաև շախմատային օլիմպիադաներում բարձր տեղեր գրաված շախմատիստներն ու նրանց մարզիչները:
Աշխարհի առաջնության առաջին երեք տեղերը զբաղեցրած մարզիկները կստանան համապատասխանաբար 300.000, 200.000 և 150.000 դրամ անվանական կենսաթոշակ, նրանց մարզիչները՝ 150.000, 100.000 և 75.000:
Իսկ Եվրոպայի առաջնություն, եվրոպական խաղերում 1-ին 3 տեղերը զբաղեցրած մարզիկները կստանան համապատասխանաբար 150.000, 120.000, 100.000 դրամ, մարզիչները՝ 75.000, 60.000 և 50.000 դրամ:
Կառավարության ուշադրությունից դուրս չեն մնացել նաև պատանեկան, ուսանողական ու մեծահասակների համաշխարհային ու եվրոպական խաղերի պատվավոր տեղերը գրավող մարզիկներն ու նրանց մարզիչները: Բայց այս դեպքում կենսաթոշակները կլինեն առավելագույնը մինչև 100 000, նվազագույնը 20 000 դրամ:
Որոշումը տարածվելու է 2019թ-ից սկսած մարզական հաջողություններ գրանցած մարզիկների ու նրանց մարզիչների վրա:
Կորոնավիրուսի «խառնած» ծրագրերը, կամ ինչու երիտասարդ հայ բռնցքամարտիկները դարձան մարզիչներ
Քանի որ 2019 թվականի Եվրոպական խաղերում ՀՀ հավաքական թիմերի մարզիկները նվաճել են 4 ոսկե, 2 արծաթե և 2 բրոնզե մեդալ, 2020 թվականի պետական բյուջեից կառավարությունն այսօր որոշեց 1.040.000 դրամ հատկացնել նրանց անվանական կենսաթոշակներ տրամադրելու համար: Ընդ որում` կենսաթոշակները տրամադրվելու են 2020թ-ի հունվարի 1-ից սկսած:
Նշենք, որ կառավարության այս որոշումը գործել է դեռ 2009 թվականից, բայց քանի որ մարզական հաջողությունների համար գումարները բյուջեում հատկացվել են նախապես, երբ հնարավոր չէր գուշակել, թե քանի մարզիկ կգրավեն մրցանակային տեղեր ու որ առաջնություններում, հատկացված գումարները հիմնականում եղել են կա՛մ շատ փոքր, կա՛մ հասել են ոչ բոլորին:
Ավելի հզոր, քան Բրյուս Լին. հայ մարզիկի ռեկորդը ցնցել է Լոնդոնին
