Հեռուստահաղորդավար, երգիչ Վարդան Սարգսյանը Faceook–ի իր էջում ահազանգում է, որ ոստիկանությունն իրեն տուգանել է դիմակը սխալ դնելու համար։ Օրենքը խախտելիս տուգանելու դեպքում Սարգսյանը խնդիր չի տեսնում, բայց, ըստ նրա, խնդիրն այն է, որ ինքը գիշերվա 2 անց է քայլել Բաղրամյան պողոտայով, որը դատարկ էր, այսինքն` ոչ մեկին վարակելու կամ ոչ մեկից վարակվելու վտանգ չի եղել։
«Գիշերվա ժամը 2:40, երբ Բաղրամյան փողոցի ամբողջ երկարությամբ նույնիսկ մեկ հոգի չկա, ինձ տուգանում են 10.000 դրամով, քանի որ այդ փողոցում միայնակ քայլելիս ես դիմակը իջեցրել եմ (ոչ թե հանել եմ, այլ իջեցրել)»,–ասում է նա իր տեսանյութում:
Հաղորդավարին զարմացրել է այն փաստը, որ իրեն տուգանող ոստիկանը կտորից դիմակ է դրել, մինչդեռ արդեն քանի օր շարունակ վարչապետ Նիկոլ Փաշինյանը և ԱՆ Արսեն Թորոսյանն ասում են, որ դրանք չեն պաշտպանում վիրուսից:
«Ես, լինելով աշխարհի հարյուրավոր երկրներում, միշտ հարգել եմ տվյալ երկրի օրենքը: Հարգում եմ նաև մերը, բայց ամբողջ փողոցում լինել միայնակ ու իջեցրել դիմակը, դա խախտու՞մ է»,–հարցնում է Սարգսյանը:
Նա ոստիկանին ներկայացնում է իր անձնագիրը` արձանագրություն կազմելու համար, բայց նշում է, որ չի պատրաստվում վճարել տուգանքը։
