ԵՐԵՎԱՆ, 5 հուլիսի - Sputnik. Այսօր կեսգիշերին ողբերգական ավտովթար է տեղի ունեցել Սևանա լճի ափամերձ հատվածում՝ Ճամբարակ-Վարդենիս ավտոճանապարհին։ ԱԻՆ մամուլի ծառայության հաղորդմամբ՝ ժամը 00:20-ին Ճգնաժամային կառավարման ազգային կենտրոն ահազանգ է ստացվել, որ Ծափաթաղ գյուղի մոտակայքում ավտոմեքենան դուրս է եկել ճանապարհի երթևեկելի հատվածից և հայտնվել Սևանա լճում։
Դեպքի վայր մեկնած փրկարարները պարզել են, որ 27-ամյա Արշակ Ղ.-ի վարած Opel Astra մակնիշի ավտոմեքենան բախվել է Աշոտ Գ․-ի վարած Toyota Alphard մակնիշի ավտոմեքենայի հետնամասին։
Բախման հետևանքով Opel –ը դուրս է եկել ճանապարհի երթևեկելի հատվածից և մոտ 50 մ ընկնելով՝ հայտնվել Սևանա լճում։
Փրկարարները լճում հայտնված ավտոմեքենայից դուրս են բերել Արշակ Ղ․-ի դին, այնուհետև ավտոմեքենան հանել են լճից, հոսանքազրկել և փակել գազի բալոնի փականը։