ԵՐԵՎԱՆ, 20 հուլիսի – Sputnik. Հայկական Զինված ուժերը պատրաստ են պաշտպանել Հայաստանի Հանրապետության ողջ սահմանագոտին ցանկացած ոտնձգություններից։ Այսօր կայացած ճեպազրույցի ժամանակ ՀՀ պաշտպանության նախարարության ներկայացուցիչ Արծրուն Հովհաննիսյանն այսպես պատասխանեց Թուրքիայի կողմից հնարավոր հարձակման դեպքում հայկական կողմի պատասխանի վերաբերյալ հարցին։
«Ես չգիտեմ` որտեղից է հստակ տեղեկությունը, որ Նախիջևանի կողմից Թուրքիան ծրագրում է հարձակվել։ Մտադրություններ ու նպատակներ գուցե կան, բայց լայնածավալ գործողությունների մասով վաղաժամ է նման հայտարարություն անել», - ասաց Հովհաննիսյանը։
Նա հավաստիացրեց, որ հայկական բանակը պատրաստ է դիմակայել ցանկացած ոտնձգության։
Ավելի վաղ արտգործնախարար Զոհրաբ Մնացականյանը Sky News Arabia-ի հետ զրույցում ասել էր, որ Թուրքիայի հնարավոր հարձակմանը Հայաստանը նախ պատասխան կտա իր ուժերով, երկրորդ՝ կդիմի ՀԱՊԿ-ի և ՆԱՏՕ-ի իր գործընկեր երկրներին։
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 18-ի պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 4 զոհ ունի, 36 վիրավոր (ևս մեկը խաղաղ բնակչությունից)։
Ի՞նչ «տվեցին» Տավուշում ընթացող մարտական գործողությունները ՀՀ ԶՈւ–ին
