ԵՐԵՎԱՆ, 23 հուլիսի — Sputnik. ՀՀ կառավարությունն այսօր հերթական նիստում որոշում ընդունեց փոխհատուցել Ադրբեջանի ռազմական ոտնձգություններից ՀՀ Տավուշի մարզի կրած վնասները:
Որոշման նախագիծը ներկայացնելիս ՀՀ Տարածքային կառավարման ու ենթակառուցվածքների նախարար Սուրեն Պապիկյանը հայտնեց, որ վերջին 10 օրվա ընթացքում Ադրբեջանն ընդհանուր առմամբ 150 մլն դրամի վնաս է հասցրել Տավուշի մարզին:
«150 մլն դրամից 25 մլն դրամն առաջարկում ենք հատկացնել հրատապության կարգով: Ստեղծվել է գույքագրման և գնահատման աշխատանքային խումբ, որն աշխատում է բնակավայրերում։ Աշխատանքներին ներգրավելով տեղի շինարարական հնարավորությունները` ներառյալ արտագնա աշխատանքի չմեկնած քաղաքացիներին»,- հայտնեց Պապիկյանը:
Վարչապետ Նիկոլ Փաշինյանն էլ հավելեց, որ մինչ այդ կառավարության դռնփակ քննարկման ընթացքում գործադիրը հանգել էր այն եզրակացության, որ Հայաստանի սահմանապահ գյուղերում վարվող պետական քաղաքականությունը հայեցակարգային փոփոխության անհրաժեշտություն ունի:
Վարչապետը նշեց, որ մինչ այժմ սահմանապահ գյուղերի նկատմամբ պետական վերաբերմունքը բխել է այն կոնտեքստից, որ դրանք միևնույն է գտնվում են հակառակորդի ուղիղ նշանակետի տակ, ու բոլոր վերակառուցման աշխատանքներն իրականացվել են այս ենթատեքստով: ՀՀ կառավարությունը, սակայն առաջարկում է փոխել այդ տրամաբանությունը:
«Սահմանապահ գյուղերը ոչ միայն պետք է վերականգնվեն, այլև դրանք պետք է ունենան զարգացման կոնկրետ քաղաքականություն, ռազմավարություն, և մենք պետք է արձանագրենք, որ սահմանապահ գյուղերում Հայաստանն ավարտվում է, այլ, որ սահմանապահ գյուղերից Հայաստանը սկսվում է»,- ասաց Փաշինյանը:
Ադրբեջանը Հայաստանի դեմ իսրայելական Spike NLOS կառավարվող հրթիռներ է օգտագործել
Սահմանապահ գյուղերի բնակիչները, վարչապետի խոսքով, թեև արդյունքները միանգամից չեն տեսնի, բայց այս մոտեցման փոփոխությունը պետք է անմիջականորեն զգան:
ԿԳՄՍ նախարար Արայիկ Հարությունյանն էլ հայտնեց, որ այցելել է Տավուշի մարզի հրետակոծված գյուղերի դպրոցներ, ծանոթացել դրանց ապաստարանների վիճակին ու մարզպետի հետ քննարկել դրանց բարելավման անհրաժեշտությունը:
«Ընդհանուր առմամբ դպրոցներն ունեն նման հնարավորություններ, բայց այնուամենայնիվ, որոշակի փոփոխություններ անհրաժեշտ է կատարել»,- ասաց նախարարը՝ հավելելով, որ այս ծրագրի համար ևս լրացուցիչ միջոցների անհրաժեշտություն կլինի:
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 23-ի պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 4 զոհ ունի, 36 վիրավոր (ևս մեկը խաղաղ բնակչությունից)։
