ԵՐԵՎԱՆ, 8 օգոստոսի - Sputnik. Սերբական Տեոչին գյուղում ապրող երկու երեխաների պատմությունը տարածվել է ամբողջ երկրում։
Եֆտովիչների ընտանիքում երկու երեխա կա ու Լյուբինկա տատը։ Նա կորցրել է երկու որդիներին․ մեկը՝ սերբ «ֆիդային», մահացել է Կոսովոյում, իսկ երկրորդը կյանքից հեռացել է ծանր հիվանդության պատճառով։ Նրա կինն էլ է մահացել, ու տատը մնացել է երկու երեխաների հետ։ Տարեց կինը խոստովանում է, որ եթե չլինեին թոռները, կյանքն անիմաստ կլիներ։
«Երկու երեխային թաղած մայրն այլևս կյանք չունի։ Բայց ես երկու թոռնիկ ունեմ՝ Միլենան ու Միլանը, ու պետք է պայքարեմ նրանց համար», - ասել է նա։
Միլենան 16 տարեկան է, Միլանը՝ 14, բայց նրանք իրենց վրա են վերցրել գյուղական ծանր աշխատանքը։ Հորից հինգ հեկտար հող է ժառանգություն մնացել, ու Միլանը մեծի պես դաշտում կարտոֆիլ ու եգիպտացորեն է ցանել և ինքն էլ մշակում է։ Երբ լրագրողը նրանց մոտ է գնացել, քույրն ու եղբայրը ստիպված են եղել ոտքի վրա խոսել, որովհետև ազատ ժամանակ չեն ունեցել` եղանով խոտ են հնձել ու դեզեր սարքել։
«Հորս գործն եմ շարունակում, ինչպես սովորեցրել է», - ասել է Միլանը։
16-ամյա Միլենան զբաղվում է տան գործերով ու լավ է սովորում դպրոցում։ Ամռանը՝ արձակուրդի ընթացքում, գումար է վաստակում մորի հավաքելով։
Լիբերլանդ՝ ինքնահռչակ պետություն Եվրոպայի կենտրոնում
«Ինձ համար դժվար չէ աշխատանքի ընդունվել ու աշխատել, միայն թե մերոնց օգնեմ։ Եթե տանը նստեի, տատս ստիպված կլիներ աշխատել, բայց նա արդեն ծեր է նման ծանր աշխատանքի համար։ Իսկ ես ամռանը միշտ էլ կարող եմ մի փոքր գումար վաստակել։ Այ ձմռանն այդ հարցն ավելի լուրջ է», - պատմել է Միլենան։
Երեխաները հատուկ կեցվածքներ չեն ընդունել լուսանկարվելու համար, մի փոքր խոսելուց հետո շարունակել են աշխատանքը։ Իսկ տատը համաձայնել է լուսանկարվել միայն մահացած որդիների լուսանկարի հետ։
