ԵՐԵՎԱՆ, 21 օգոստոսի – Sputnik․ Հայ շախմատիստները երկրորդ հաղթանակը տարան շախմատի 44-րդ համաշխարհային օլիմպիադայում, որն առաջին անգամ առցանց է անցկացվում:
Երրորդ տուրում Հայաստանի հավաքականը ջախջախեց Թուրքիային՝ 4,5:1,5: Պարտիարները հաղթանակով ավարտեցին Լևոն Արոնյանը, Էլինա Դանիելյանը, Աննա Սարգսյանը և Հայկ Մարտիրոսյանը: Լիլիթ Մկրտչյանը միավորները կիսեց մրցակցի հետ, իսկ Գաբրիել Սարգսյանը պարտվեց: Առաջին խաղային օրվա երկրորդ տուրում հայ շախմատիստները նվազագույն հաշվով զիջեցին բուլղարացիներին՝ 2,5։3,5 հաշվով, իսկ առաջինում 4։2 հաշվով հաղթեցին ռումինացիներին։
Հայաստանի շախմատի ֆեդերացիայի նախագահ Սերժ Սարգսյանը Տ. Պետրոսյանի անվան շախմատի տանը հետևում էր առցանց օլիմպիադայի պարտիաներին։
Օգոստոսի 21-ին առաջին առցանց օլիմպիադայի մեդալների համար պայքարի մեջ մտան 40 ուժեղագույն հավաքականներ, որոնք բաժանված են 4 խմբի: Հայաստանի հավաքականը Ռուսաստանի, Ալժիրի, Անգլիայի, Բուլղարիայի, Եգիպտոսի, Մարոկկոյի, Ռումինիայի, Թուրքիայի և Խորվաթիայի հավաքականների հետ միևնույն խմբում է հայտնվել։
Յուրաքանչյուր խմբի հաղթողներն ուղղակիորեն կանցնեն քառորդ եզրափակիչ։ Քառորդ եզրափակիչի ևս 4 ուղեգիր կվիճարկեն այն թիմերը, որոնք ընտրական խմբերում կզբաղեցնեն երկրորդ և երրորդ տեղերը: Եզրափակիչը տեղի կունենա «նոկաուտ» սկզբունքով։
Հուլիսի 25-ին մեկնարկած օլիմպիադային մասնակցում է 163 թիմ: Խաղում են վեց խաղատախտակների վրա։ Յուրաքանչյուր թիմում կա երկուական տղամարդ և կին, ինչպես նաև մինչև 20 տարեկան տղաներ և աղջիկներ։
