ԵՐԵՎԱՆ, 30 օգոստոսի – Sputnik. ՀՀ վարչապետ Նիկոլ Փաշինյանն Արցախում է։ Facebook-ի իր պաշտոնական էջում նա գրառում է կատարել՝ տեղեկացնելով, որ Արցախի Հանրապետության նախագահ Արայիկ Հարությունյանի հետ հանդիպում են ունեցել պաշտպանության բանակի շտաբում։
«Այսօր Արցախի պաշտպանության բանակի շտաբում տեղի ունեցած խորհրդակցության ընթացքում քննարկել ենք Հայաստանի եւ Արցախի ռազմական համագործակցության հետագա խորացմանը եւ հակառակորդին զսպելու մեխանիզմների կատարելագործմանը վերաբերող մի շարք հարցեր»,- գրել է Նիկոլ Փաշինյանը:
Հիշեցնենք՝ երեկ ՀՀ վարչապետ Նիկոլ Փաշինյանը, պաշտպանության նախարար Դավիթ Տոնոյանն ու այլ բարձրաստիճան պաշտոնյաներ Արցախում ներկա գտնվեցին ԼՂՀ Գերագույն խորհրդի առաջին նախագահ Արթուր Մկրտչյանին և ԱՀ ՊԲ N զորամասի 4-րդ հրաձգային վաշտի հրամանատար, կապիտան Արմենակ Ուրֆանյանին հետմահու «Արցախի հերոս» բարձրագույն կոչում շնորհելու արարողությանը։
