ԵՐԵՎԱՆ, 25 սեպտեմբերի - Sputnik. ՀՀ վարչապետ Նիկոլ Փաշինյանն այսօր ընդունել է Արցախի Հանրապետության Ազգային ժողովի նախագահ Արթուր Թովմասյանի գլխավորած պատվիրակությանը։ Տեղեկությունը հայտնում է վարչապետի մամուլի ծառայությունը։
Հանդիպման ընթացքում վարչապետը խոսել է տարածաշրջանում հաստատված լարված իրավիճակի մասին՝ նշելով, որ բանակցային գործընթացն արդյունավետ դարձնելու խնդիր կա։
«Այս վերջին շրջանում Ադրբեջանի ղեկավարությունը փորձում է մեզ մեղադրել բանակցությունները վիժեցնելու մեջ՝ այն տրամաբանությամբ, որ մենք արել ենք և անում ենք հայտարարություններ, որոնք անիմաստ են դարձնում բանակցությունները»,- ասել է Փաշինյանն ու հավելել, որ վարչապետի պաշտոնը ստանձնելուց հետո հակամարտության պատմության ողջ ընթացքի համար աննախադեպ հայտարարություն է արել. ասել է, թե Արցախի հարցի որևէ լուծում պետք է ընդունելի լինի Հայաստանի ժողովրդի համար, Ադրբեջանի ժողովրդի համար և Արցախի ժողովրդի համար։ Փաշինյանը խոստովանում է, որ ակնկալում էր, թե հայտարարությունը համարժեք արձագանք կգտնի Ադրբեջանի ղեկավարության շրջանում, ինչը թույլ կտա բանակցություններում ճեղքում արձանագրել։ Սակայն Ադրբեջանը շարունակում է պնդել, թե Ղարաբաղի հարցը կարող է լուծվել բացառապես Ադրբեջանի տարածքային ամբողջականության շրջանակում: Վարչապետը վստահ է՝ որևէ հակամարտություն հնարավոր չէ կարգավորել՝ վերադառնալով նրա ծագման իրավիճակին:
«Ուզում եմ ընդգծել, որ մեր բոլոր այն հայտարարությունները, որոնք, այսպես ասած, ականջահաճո չեն Ադրբեջանի ղեկավարությանը, մեր համարժեք արձագանքն են նրանց արած ապակառուցողական հայտարարություններին: Ընդ որում՝ ուզում եմ էլի հստակ ասել, որ Ադրբեջանը փորձում էր բանակցային գործընթացի հիմքում դնել հետևյալ տրամաբանությունը՝ միակողմանի զիջումներ արեք, թե չէ Ադրբեջանն ուժային մեթոդներով կլուծի հարցը»,- ասաց Նիկոլ Փաշինյանը՝ շեշտելով, որ հենց սկզբում էլ հստակ ասվել է՝ Հայաստանի հետ պետք չէ ուժի և սպառնալիքի լեզվով խոսել:
Վարչապետի խոսքով՝ շատերին թվում էր, թե սա ընդամենը հռետորաբանություն է, բայց հուլիսյան դեպքերը ցույց տվեցին, որ ասվածը 100 տոկոսով համապատասխանում է իրականությանը:
Զգուշացեք. ադրբեջանցիները խուճապ տարածող հաղորդագրություններ են ուղարկում
«Նաև հրապարակային եմ ասել, մեր դիրքորոշումը հետևյալն է՝ Ղարաբաղի հարցը չունի ուժային լուծում: Եթե Ղարաբաղի հարցն ունի ուժային լուծում, ուրեմն Արցախի ժողովուրդը կասի՝ ես վաղուց դա լուծել, ավարտել եմ: Վերջ: Էլ ինչ ենք քննարկում: Բայց մենք ասում ենք՝ ոչ: Մենք համաձայն ենք, որ պետք է երկարատև, կայուն խաղաղություն հաստատվի տարածաշրջանում, և դրա համար առաջարկում ենք բանաձև, որևէ լուծում: Սա Ադրբեջանի, Հայաստանի և Արցախի ղեկավարների անձնական պատասխանատվությունն է, և մենք պետք է չարչարվենք, աշխատենք՝ գտնել այնպիսի լուծում, որն ընդունելի կլինի Հայաստանի ժողովրդի համար, Արցախի ժողովրդի համար, Ադրբեջանի ժողովրդի համար»,- հայտարարեց Փաշինյանը՝ հավելելով, որ, սակայն, Ադրբեջանի ղեկավարությունը շարունակում է գնալ հին ճանապարհով՝ քարոզչական արշավին ավելացնելով մի նոր կոմպոնենտ՝ «կոնֆիդենցիալ ինֆորմացիաների բացահայտում»:
Ադրբեջանը պետք է հրաժարվի ռազմական շանտաժի քաղաքականությունից. Արցախի ԱԳՆ-ն՝ Ալիևին
Գործադիրի ղեկավարը խորհուրդ է տալիս ադրբեջանցիներին չգնալ այդ ճանապարհով, որովհետև, նրա խոսքով, եթե մուտք արվի «կոնֆիդենցիալ ինֆորմացիաներ տարածման դաշտ», ապա Ադրբեջանի ներքաղաքական վիճակը հուսահատորեն կապակայունանա:
