ԵՐԵՎԱՆ, 1 հոկտեմբերի –Sputnik. Մարտական գործողությունները լուսաբանելու ժամանակ վիրավորվել է «Արմենիա» հեռուստաընկերության օպերատոր Արամ Գրիգորյանը: Տեղեկությունը հայտնում է Հայկական միասնական տեղեկատվական կենտրոնը։ Տեղեկացվում է, որ խմբում եղել են այլ լրագրողներ:
«Արմենիայի» հեռուստամեկնաբան Էռնա Էլիզբարյանը Facebook–ի իր էջում մանրամասներ է հայտնել օպերատորի առողջական վիճակի մասին։
«Վնասվածքը բարեբախտաբար թեթև է: Արամ Գրիգորյանը Ապրիլյան քառօրյա պատերազմի մասնակից է»,–գրել է նա:
ՀՀ «Հանրային կապերի և տեղեկատվության կենտրոն» ՊՈԱԿ-ի ղեկավար Հովհաննես Մովսիսյանն ավելի վաղ հայտնել էր, որ ֆրանսիական «Le Monde» պարբերականի լրագրողները հրետակոծության տակ են ընկել Արցախի Մարտունի քաղաքում։ Կա երկու վիրավոր, նախնական տվյալներով` երկուսն էլ Ֆրանսիայի քաղաքացի են։
ՀՀ ԱԳ նախարարի մամուլի քարտուղար Աննա Նաղդալյանի տվյալներով` այս օրերի ընթացքում ԱԳՆ-ում հավատարմագրվել են միջազգային առաջատար 5 տասնյակից ավելի լրատվամիջոցների լրագրողական խմբեր՝ մոտ 200 օտարերկրյա լրագրողներ, որոնց գերակշռող մասը արդեն իսկ գտնվում է Հայաստանում և Արցախում: Հավատարմագրման դիմումները նույն ինտենսիվությամբ շարունակվում են։
