ԵՐԵՎԱՆ, 14 հոկտեմբերի — Sputnik. Հայկական միասնական տեղեկատվական կենտրոնը նոր տեսանյութ է հրապարակել, որում երևում է թե ինչպես են Հայաստանից և արտերկրից Արցախ ժամանած բազմաթիվ կամավոր բժիշկներ օգնություն ցուցաբերում վիրավորներին։
«Երբ սկսվեց պատերազմը մենք` մի խումբ բժիշկներով, եկանք Ստեփանակերտ, որպեսզի օգնենք մեր կոլեգաներին։ Արդեն 2 շաբաթ է, ինչ այստեղ ենք»,–ասում է բժիշկ Շահեն Դանիելյանը։
Նրա խոսքով, վիրավորների 99 %-ը ունեն բազմաբեկորային վնասվածքներ։
«2 օր առաջ մի դեպք եղավ, հիվանդներից մեկն աչքերը բացեց և ինձ ճանաչեց, շատ հուզվել էի, սկսեց ինձ սիրտ տալ, ասաց` բժիշկ ջան, ցավդ տանեմ, ո՞նց ես։ Ես կրկին անգամ համոզվեցի, որ մենք հաղթելու ենք»,–պատմեց բժիշկը։
Հավելենք, որ հոկտեմբերի 12–ին Ֆրանսիայից մի խումբ կամավոր բժիշկներ են Հայաստան եկել օգնելու Արցախում վիրավորվածներին։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 14-ի ժամը 11:00-ի դրությամբ` հակառակորդի կրակոցների հետևանքով զոհվել են 532 զինծառայողներ և 31 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:
«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը
