ԵՐԵՎԱՆ, 1 նոյեմբերի - Sputnik. Նյու Յորքի հայ համայնքը The New York Times թերթի խմբագրության շենքի դիմաց բողոքի ակցիա է իրականացնում։ Sputnik Արմենիայի պատրաստած տեսանյութում երևում է, թե ինչպես են հավաքվածները «Պահանջում ենք պատասխանատու լրագրություն», «Ասեք ճշմարտությունը», «Դուք վարձատրվում եք արյունոտ փողերից» պաստառներ բռնել և կոչեր են վանկարկում։
Հայերը պահանջում են հերքել թերթի` Թուրքիայի բյուրոյի ղեկավար Կառլոտա Գալի հոդվածները, որոնք ակնհայտ ադրբեջանամետ են և աչառու։
Կառլոտա Գալը Արցախում ընթացող պատերազմի մասին մի քանի հոդված է հրապարակել։ Դրանցից մեկում, օրինակ, ասվում է, որ հայկական ԶՈւ–ն թիրախավորել է ադրբեջանական Բարդա քաղաքի խաղաղ բնակչությանը` հատկապես երեխաներին, որը իրականությանը չի համապատասխանում։
Հիշեցնենք, որ Արցախի դեմ ադրբեջանական ագրեսիայի առաջին իսկ օրից աշխարհի բազմաթիվ երկրներում տեղի հայ համայնքի ներկայացուցիչներն ու նրանց համակիրները բողոքի ակցիաներ են իրականացնում՝ ընդդեմ Ադրբեջանի ու Թուրքիայի։
Հավելենք, որ որոշ տեղերում, այդ թվում Ֆրանսիայում ու Իսրայելում, խաղաղ ցուցարարները հարձակման են ենթարկվել ադրբեջանցիների ու թուրքերի կողմից։
Միջադեպ Ֆրանսիայում. թուրքերը մուրճով հարվածել են բողոքի ակցիա անող հայերից մեկի գլխին
