ԵՐԵՎԱՆ, 3 նոյեմբերի - Sputnik. Հայաստանում Covid թեստերի գները համարժեք են հարևան և այլ երկրների գներին։ Այսօր ԱԺ–ում հաջորդ տարվա բյուջեի նախագծի քննարկման ժամանակ, պատասխանելով պատգամավորների հարցերին, ասաց ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը։
«Մենք խոսեցինք տնտեսվարող սուբյեկտների հետ, հորդոր, խնդրանք հնչեցրեցինք, որին, ի պատիվ իրենց, տնտեսվարող սուբյեկտները դրական արձագանք տվեցին ու գները որոշ դեպքերում` 5 000, որոշ դեպքերում 10000, 15 000 դրամով իջեցրեցին»,– ասաց Գևորգյանը։
Նա նաև նշեց, որ այսօր Հայաստանում նույնիսկ 10 000 դրամանոց թեստեր կան, և տնտեսվարողներն ազատ են մրցակցային իրավիճակից ելնելով՝ ավելի էժան գին նշանակելու։
«Պետությունը դեմ չէ միջամտություն անելու, եթե անհրաժեշտություն կա վերին գին սահմանելու, բայց ոչ մեր մարմինը, քանի որ մեր մարմինը նման ֆունկցիա չունի»,– ասաց Գևորգյանը։
Նման փորձ որոշ երկրներում կիրառվում է դեղերի շուկայում։ Բայց հանձնաժողովի նախագահը նշում է, որ այդ կարգավորման հետ պետք է շատ զգույշ վարվել, քանի որ դա կարող է նաև այլ ծայրահեղության հանգեցնել. տնտեսվարողները գնային կարգավորման մեջ տեղավորվելու համար սկսում են ներկրել ամենաանորակ տարբերակները կամ ուղղակի լքում են տվյալ ապրանքային կամ ծառայությունների շուկան։
«Այդ ընկերությունները, որոնք, միգուցե նաև պետության խնդրանքով, սկսել են նման ծառայություններ մատուցել, այլև չմատուցեն»,– ասաց Գևորգյանը։
Այդուհանդերձ գնային կարգավորումը, Գեղամ Գևորգյանի խոսքով, դուրս է ՏՄՊՊՀ–ի լիազորությունների տիրույթից։ Նման որոշում կարող է կայացնել կառավարությունը, բայց մինչ այդ շուկան պետք է ամենայն լրջությամբ ուսումնասիրվի։
Հիշեցնենք, որ կորոնավիրուսով վարակվածների թիվը Հայաստանում վերջին մեկ օրում ավելացել է 1328–ով և դարձել 94776։
Կատարվել է ընդհանուր առմամբ 413 515 թեստավորում։
Պատերազմն ու կորոնավիրուսը. ՀՀ առողջապահության նախարարությունը պատասխանել է քննադատությանը
