ԵՐԵՎԱՆ, 3 նոյեմբերի — Sputnik. Աշխարհի որևէ պետություն ապահովագրված չէ ահաբեկչությունից: Վիեննայում տեղի ունեցած ահաբեկչական գործողությունների կապակցությամբ իր վշտակցությունը հայտնելով` ասել է Արցախի նախագահ Արայիկ Հարությունյանը` Facebook սոցցանցի իր էջում գրառում անելով։
«Երեկ երեկոյան Ավստրիայի մայրաքաղաք Վիեննայում տեղի ունեցած ահաբեկչական գործողությունները ևս մեկ անգամ փաստեցին, որ միջազգային ահաբեկչության դեմ պայքարը չի կարող ընտրողական լինել, քանի որ այն մարդկությանը սպառնացող մեր ժամանակների ամենամեծ վտանգն է»,– նշել է Հարությունյանը։
Նա հայտնել է, որ ավելի քան մեկ ամիս է՝ Արցախը ողջ միջազգային հանրության աչքի առաջ նույնպես ահաբեկչության թիրախ է դարձել՝ պայքարելով Ադրբեջանի և Թուրքիայի կողմից Հարավային Կովկասն ահաբեկչության նոր օջախ դարձնելու նկրտումների ու փորձերի դեմ:
Ավստրիայում ՀՀ դեսպանությունը զգոնության կոչ է անում
Ավելին, Արցախի ժողովուրդը ենթարկվում է ահաբեկչության ու մարդկության դեմ հանցագործության՝ կրելով մարդկային ու նյութական մեծ կորուստներ: Հարությունյանը նշել է, որ խստորեն դատապարտում է ահաբեկչության ցանկացած դրսևորում, էթնիկ կամ կրոնական պատկանելության հիմունքներով խաղաղ բնակչությանը դիտավորությամբ թիրախավորելու ցանկացած փորձ: Նրա խոսքով` ահաբեկչությունն ու ծայրահեղականությունը սատարողներին, ֆինանսավորողներին և իրականացնողներին, ինչպես նաև ատելության հողի վրա բռնություն հրահրողներին արդարացնելու ցանկացած գործողություն պետք է վճռական կերպով դատապարտվի:
«Արցախի Հանրապետությունը շարունակում է հավատարիմ մնալ այս սկզբունքներին և պատրաստ է իր ներդրումն ունենալ ահաբեկչության դեմ պայքարում»,–ասել է Հարությունյանը։
Հիշեցնենք՝ նոյեմբերի 2-ի երեկոյան Ավստրիայի մայրաքաղաք Վիեննայում տեղի ժամանակով 20։00-ի մոտակայքում (Երևանի ժամանակով՝ 23։00-ին) անհայտ անձինք զինված հարձակումներ են իրականացրել քաղաքի կենտրոնում։ Կա չորս զոհ, 18 վիրավոր։
Սա քաղաքակրթության և բարբարոսության պայքարն է․ Կուրցը՝ Վիեննայի ահաբեկչության մասին
