ԵՐԵՎԱՆ, 4 նոյեմբերի - Sputnik. Հայաստանում ևս հինգ դատապարտյալներ պայմանական վաղաժամկետ ազատ են արձակվել. նրանք դիմումներ են գրել, որ ուզում են մեկնել ռազմաճակատ։ Տեղեկությունը Sputnik Արմենիային հայտնեցին գլխավոր դատախազության մամուլի ծառայությունից։
«Խիստ անհատական մոտեցում է ցուցաբերվում` խնդրի նրբությունը հաշվի առնելով», - նշեցին գերատեսչությունում։
Հոկտեմբերի 30-ին հայտնել էինք, որ 12 կալանավորի խափանման միջոցը փոխվել է, իսկ չորս դատապարտյալ էլ վաղաժամկետ պայմանականով են ազատ արձակվել` ռազմաճակատ գնալու նկատառումով
Այսպիսով, ՔԿՀ-ից ռազմաճակատ է մեկնել ընդհանուր 21 մարդ։ Sputnik Արմենիայի տեղեկություններով՝ նրանք բոլորն արդեն Արցախում են։
ՀՀ ԱՆ Քրեակատարողական ծառայությունից էլ Sputnik Արմենիայի հարցմանն ի պատասխան հայտնել էին, որ իսկապես մի շարք դատապարտյալներ դիմումներ են ներկայացրել առաջնագիծ մեկնելու համար, սակայն չէին նշել, թե քանի մարդ է նման դիմում ներկայացրել, և որ հոդվածներով են նրանք դատապարտված։
Մեր տեղեկություններով` դիմում գրածների թիվը մի քանի տասնյակի է հասնում, նրանք հիմնականում ուժային կառույցների նախկին աշխատակիցներ են, ինչպես նաև արցախյան առաջին պատերազմի մասնակիցներ։