ԵՐԵՎԱՆ, 14 նոյեմբերի — Sputnik. Ռուսաստանը մեկ օրում 170 խաղաղապահներով 20 ինքնաթիռ է ուղարկել Ղարաբաղ։ Հայտնում է ՌԻԱ Նովոստին` հղում անելով ՌԴ պաշտպանության նախարարությանը։
Ավելի վաղ գերատեսչության ղեկավար Սերգեյ Շոյգուն հայտարարել էր, որ արդեն ավելի քան 1100 ռուս խաղաղապահներ են տեղափոխվել Լեռնային Ղարաբաղ` 73 թռիչք կատարելով։
«Օդանավերը, բացի խաղաղապահներից, Հայաստան են հասցրել ավելի քան 20 ծանր կցորդիչներով մեքենաներ, որոնք նախատեսված են դժվարանցանելի ճանապարհերը հաղթահարելու համար»,–նշված է պաշտպանության նախարարության հաղորդագրության մեջ:
Հայտնել էինք, որ Ռուսաստանի պաշտպանության նախարարությունը տեսանյութ է հրապարակել, որտեղ ՌԴ օդուժի ուղղաթիռներն ուղեկցում են Լեռնային Ղարաբաղ ուղևորվող ռուս խաղաղապահների շարասյանը:
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Հայաստանի, Ադրբեջանի և Ռուսաստանի առաջնորդների եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Արզումանյանն ու Մուրադովը քննարկել են խաղաղարար առաքելության կազմակերպման հարցերը
