ԵՐԵՎԱՆ, 25 նոյեմբերի – Sputnik. 18-ամյա ժամկետային զինծառայող Ժորա Թարզյանը արցախյան պատերազմում վիրավորվելուց հետո կրկին քայլել է սովորել։ Տղայի հերոսությունների մասին տեսանյութ է հրապարակել Քանաքեռ-Զեյթուն բժշկական կենտրոնը։
Ժորան երկու ամսվա ծառայող է եղել, երբ սկսվել է պատերազմը։ Պատմում է, որ չնայած կարճ ժամանակահատվածին, հասցրել է շատ բան սովորել։
«Կարողացել ենք մեր առջև դրված մարտական խնդիրները կատարել։ Դիրքերից մեկը փոխելու ժամանակ արկեր պայթեցին, ես բեկորային բազմաթիվ վնասվածքներ ստացա, բայց դեռ կարողանում էի քայլել, մոտ 40 րոպե դիրքից ավելի ծանր վիրավորների ենք դուրս բերել»,–ասում է նա։
Տղայի խոսքով` հետո ինքն ուշաթափվել է։ Ժորային տեղում առաջին բուժօգնություն են ցուցաբերել, այնուհետև տեղափոխել Ճարտար, որտեղ բեկորներից մի քանիսը հեռացրել են, որոշ ժամանակ հետո տեղափոխել են Երևան։
Քանաքեռ-Զեյթուն բժշկական կենտրոնում նրա առողջական վիճակը միջին ծանրության են գնահատել։
Հիվանդանոցում ասում են` սպիտակցի զինվորը բախտավոր աստղի տակ է ծնվել. եթե չլիներ զրահաբաճկոնը, դժվար թե հնարավոր լիներ փրկել նրա կյանքը։
«Հիմա հոգեբանական առումով շատ դժվար է այդ ամենը հիշելը, ամեն անգամ զոհված զինակիցներիս անունները կարդալիս մեծ ցավ եմ ապրում։ Չնայած դժվարությանը` գիտակցում եմ, որ խաղաղ երկինք ունենալու գրավականը մարտունակ ու հզոր բանակն է»,–ասում է նա։
Բեկորներից մի քանիսը` որպես պատերազմից մնացած հիշատակ, Ժորան կկրի ողջ կյանքի ընթացքում։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ ՀՀ առողջապահության նախարար Արսեն Թորոսյանը նոյեմբերի 18-ին ԱԺ–ում լրագրողներին հայտնեց, որ պատերազմի առաջին օրվանից մինչև նոյեմբերի 17-ի երեկոյան պաշտոնապես հաստատված զոհված զինծառայողների թիվը 2425 է։
Նոյեմբերի 20-ի տվյալներով՝ Արցախի ՊԲ-ն հրապարակել է 1678 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
