ԵՐԵՎԱՆ, 7 դեկտեմբերի - Sputnik. Սպիտակի երկրաշարժի 32-րդ տարելիցի կապակցությամբ այսօր ԱՀ նախագահ Արայիկ Հարությունյանն Անվտանգության խորհրդի քարտուղար Վիտալի Բալասանյանի հետ այցելել է Ստեփանակերտի հուշահամալիր, Facebook-ի էջում գրել է Արայիկ Հարությունյանը։
Նրանք հարգանքի տուրք են մատուցել 1988-ի Սպիտակի կործանարար երկրաշարժի տասնյակ հազարավոր զոհերի հիշատակին։
«Ավերիչ երկրաշարժի հետևանքով հաշված վայրկյանների ընթացքում հողին հավասարվեցին մայր Հայաստանի մի շարք բնակավայրեր, ամայացան երբեմնի ծաղկուն քաղաքներն ու գյուղերը, անօթևան մնացին հարյուր հազարավոր մարդիկ։
Ցավը խորն էր, վերքերն անբուժելի։ Սակայն մեր ժողովուրդն արդեն որերորդ անգամ կարողացավ ուժ գտնել իր մեջ և հաղթահարել պատուհասած փորձությունը, կարողացավ շտկել ճակատագրի հուժկու հարվածից կորացած մեջքը և շարունակել ապրել ու արարել, ինչպես իր բազմադարյա պատմության ողջ ընթացքում»,-նշված է գրառման մեջ։
Մարդու մասնակցությամբ աղետների թիվն ավելի մեծ է. Լավրովը` Սպիտակի երկրաշարժի մասին
Հիշեցնենք, որ 1988 թվականի դեկտեմբերի 7-ին Հայաստանում գրանցված երկրաշարժի հետևանքով, պաշտոնական տվյալներով, զոհվել է 25 հազար մարդ, 140 հազարը հաշմանդամ է դարձել, ավելի քան 500 հազարը զրկվել է տնից։
